Llucha pa salvar el mundiu escontra los malvados villanos de los comics de Marvel. Pon el traxe d’heroes y heroines creaos pol estudiu de Stan Lee. Bienveníos a Marvel Champions, el LCG de superheroes, n’asturianu

Ficha:

• Xugadores: 1-4
• Duración: 1-2 horas (aunque pue ser bastante menos)
• Edad: 14+
• Editau por: Fantasy Flight Games
• Autor: Michael Boggs, Nate French y Caleb Grace
• Ficha na BGG

Conteníu:

• 343 cartes (199 de xugador, 137 d’encuentru, 7 de referencia)
• 30 cartes d’estáu
• 62 fiches de dañu
• 16 contadores xenéricos
• 33 fiches d’amenaza
• 5 fiches d’aceleración
• 1 ficha de xugador inicial
• 4 mididores de vida de xugador
• Mididor de vida de villanu.
• Reglamentu d’entamar a xugar
• Guía de referencia

De que va Marvel Champions

En Marvel Champions vamos ponemos na pelleya de los archiconocios superheroes de los comics de Marvel. Spiderman, Iron Man, Pantera Negra entre otros. L’oxetivu ye cenciellu, hai que derrotar al villanu que nos enfrentemos n’antes de que lleve a cabu’l so plan. Si lo facemos ganamos, si non… El villanu fizose cola suya.

Amás, comentamos enriba que ye’l “LCG” de superheroes pero…

¿Qué ye un LCG?

LCG son les sigles de Living Card Game, son xuegos que van tener munches espansiones pero a diferencia de los xuegos de cartes coleicionabes, siempre sabes lo que merques. A diferencia, por exemplu, de Magic que cuando merques un sobre, nun sabes les cartes que te vienen, equí cuando merques una espansión, superheroe o villanu a tos nos van venir les mesmes cartes. Normalmente, los packs d’espansion suelen venir ca 2-3 meses los pequeños y ya ca 6 o más los grandes. Como podéis imaxinar pue convertise nun xuegu mui caru. Pero d’eso ya falaremos mas alantre.

¿Como se xuega a Marvel Champions?

Preparación de la partida.

Como pasaba en “Arkham Horror: El Juego de cartas“, pa entamar xugar tenemos que tener el nuesu mazu de xuegu fechu. Esto ye escoyer un superheroes y xuntar cartes d’un aspeutu qu’escoyamos (agresividá, xusticia, protección y lideralgu) y básiques. Nun vos asustar, la caxa ya bien con un mazu pa ca héroe preparáu por si nun vos apetez facer un mazu de cero. Teniendo esto, coyemos un contador de vides d’heroe y ponemos la vida que nos indique’l nuesu superheroe y separamos la carta d’obligación de ca héroes. Ca héroe vien con un archienemigu propiu, apartámoslu tamién. Facemos to esto pa ca xugador.

Ponemos toles fiches y cartes d’estau a mano de tolos xugadores.

Toca agora escoyer escontra que villanu vamos lluchar. Una vez elexiu ponemos la vida nel contador de vida del villanu y siguimos les instrucciones pa la construcción del mazu del villanu. Esto suele ser, poner en xuegu una carta de plan principal (alcordavos ye’l que si cumple perdemos) y xuntar les cartes de villanu coles d’encuentru que nos diga l’escenariu. Cuando tengamos to, lleemos y resolvemos la carta del plan y baraxamos tol mazu del villanu añadiendo la carta d’obligación qu’apartamos enantes.

Ya pa finar, colocamos la carta de superheroe na postura d’alter ego y robamos les cartes que nos diga’l tamañu de mano. Podemos renovar la mano una vez descartando les cartes que nun nos gusten y robando’l mismu númberu.

Y ya ta, ya podemos entamar a xugar.

Entamamos a xugar.

Nun voi a entrar a esplicar como se xuega a esti xuegu. No porque nun seya cenciellu, sino porque tien bastantes matices nos que parase que quedaría una entra demasiao llarga y nun ye l’oxetivu del blog. Voi comentar per enriba como se xuega y vamos de frente a les valoraciones que creo ye polo que tais equí.

El xuegu tien dos fases bien diferencies: La fase de los xugadores y la fase del villanu.

Fase de xugadores

Nesta fase y por orden van dir faciendo les sus aiciones los xugadores. Entre les aiciones que puen facer los xugadores son les siguientes:

• Cambiar d’héroe a alter ego y viceversa (una vez na más por turnu)
• Xugar cartes de la mano
• Usar un atributu básicu (ataque, recuperación, intervención)
• Usar un aliáu
• Aplicar una capacidá d’aición.

Vamos paranos un poco en como xugar cartes, que ye un poco lo diferente nesti xuegu a otros LCGs. Les nueses cartes tienen un coste (apaez enriba a la izquierda), un nome, habilidaes, atributos, vida… Y abaxo a la izquierda vienen una serie d’iconos (unu o más). Pos bien, cuando decidamos xugar una carta de la mano, tenemos que decidir si ye pa baxala al área de xuegu o bien usala como recursos. Si ye esto último, descartamos les cartes necesaries pa xuntar los recursos pa xugar la carta que queramos llevar a la mesa. Como apunte, nun se puen repartir los recursu d’una carta pa xugar diferentes cartes.

Cuando tos hayan finao, roben les cartes indicaes na capacidá de mano de la carta que tengan boca enriba (alter ego o héroe) y ya sedría’l turnu del villanu.

Fase del Villanu.

Cuando finen tolos xugadores, entamamos la fase del villanu. Pa ello siguimos estos pasos un a un y toles rondes.

• Colocamos l’amenaza nel plan principal. La propia carta va indicanos cuantos tenemos que poner.
• Una vez por xugador el villanu s’activa xunto a los esbirros.
• Repartimos y resolvemos una carta d’encuentru por xugador (salvo que s’indique otra cosa, ye una). Si ye un esbirro, ponemoslu enfrentáu al xugador, si ye un plan ponse en xuegu, y si ye una perfidia resuelvese y descartase
• Cambiamos el xugador inicial y entamamos una nueva ronda.

Vamos paranos na activación de los villanos y esbirros, que ye lo que pue tener más chicha. Pa entamar, damos-y una carta boca abaxo del mazu d’encuentros.

Agora toca mirar en qu’estau esta’l xugador. Si ta n’héroe, el villanu ataca. Esto ye sumar l’atributu d’ataque y sumar los aumentos de la carta que robamos (iconos d’estrelles d’abaxo a la izquierda). Podemos defendenos del ataque col héroe (restando la capacidá de defensa) o con un aliáu.

Si por contra tamos n’alter ego. El villanu intervien el plan, n’otres pallabres, pon contadores nel plan principal. Esto nun se pue defender, en principiu, asina que sumamos l’atributu de plan a los iconos d’aumentu de la carta que robamos.

Facemos to esto pa ca xugador.

Pa ganar

Como diximos antes, ganamos si derrotamos al villanu. Perdemos si morremos o’l villanu completa’l plan.

Opinión personal.

Vamos cola opinión personal d’esti LCG de Superheroes que nos trae en castellán Fantasy Flight Games.

Lo primero qu’hai que destacar ye eso. Ye un LCG, esto quier dicir que va tener munches espansiones (d’afechu ya tien munches espublizaes y otres tantes anunciaes). Si te gusta tenelo to vas dexar una bona cantidá de perres nesti xuegu. Cola caxa básica de Marvel Champions ya tienes pa bastantes partíes. Vien con 5 heroes pa xugar y tres villanos, po lo qu’entre uno y otro xuegues unes cuantes tardes. La mio recomendación ye mercar los héroes y villanos que te presten y los que nun te dean muncho más dexalos pa más alantre. Daquién podrá decite que nun vas tener toles cartes, y ye verdad, dalguna carta solo sal en packs espcificos. Pero’l xuegu ye perfeutamente xugable.

Otru aspeutu a tener en cuenta ye la narrativa. Pa mi de los tres LCGs actuales ye’l menos narrativu. Compensalo con un menor tiempu de xuegu y que seya más fácil encadenar partíes. Por ponevos un exemplu, nel tiempu d’una partida d’Arkham Horror pues echar tranquilamente dos a Marvel Champions. Menos narrativu pero temática nun falta, la verdá ye que les habilidaes de los héroes y de los villanos ta mui bien fecha, resaltando les virtúes de los comics. Si tabes esperando los héroes de les películes vas llevar un chascu.

Un aspeutu que pa mi pesa en contra ye que, al menos nesta caxa base (veremos más alantre nes espansiones de campaña que pronto vos falare) nun hai un filu conductor nes partíes. Lluches escontra un villanu y cuando la partida fina, finó. Nun hai na detrás, salvo quieras xugar escontra otru villanu como si fuese una partía nueva.

Tamién valorar l’aspeutu de la construcción del mazu del héroe. Habrá daquién que no-y guste, y no se pue echar en cara, pue llegar a facese pesao. Sobre to cuando entames a tener una colección grande. Pa otros ye parte de la gracia del xuegu. Yo nel casu del Marvel Champions, toi de momento nel primer casu. Pero nun vos preocupar, tenéis a disposición https://es.marvelcdb.com/ n’onde la xente comparte mazos que pues coyer pa les tus partíes.

Ya pa finar, dicir que’l xuegu ye altamente rexugable. Ca héroe en si tien la so manera de xugar, a lo que combinao col aspeutu que quieras poner fai munches combinaciones pa probar. Lo mesmo pasa col villanu, que pues cambiar los conxuntos d’encuentros faciendo que la partía seya distinta.

Resumen Final

Vamos col resumen final dempués d’esti tochu d’enrriba. Marvel Champions ye un LCG pa xugar nun espaciu cortu de tiempu nel que te tresporta a les viñetes de los comics, y lo fai pa mi gusto mui bien. La pega que tien ye que se pue convertir nel xuegu más caru de la to colección (pudiera dicise lo mesmo de tos los LCGs) y el su puntu flacu ye la narratividá

Marvel Champions va prestate si:

• Prestente los xuegos de superheroes
• Busques un LCG rápidu nel que no t’importa que nun esista campaña
• Busques un xuegu collaborativu (pa mi gustu no más de dos).
• Quies un xuegu con un mui bon solitariu.
• No tienes problema por tener munches espansiones o si vas a tiru fixu a los que quies.

Marvel Champions nun te va prestar si:

• Busques un xuegu de campaña o con narrativa elevada.
• Yes completista pero nun te quies dexar el sueldu.
• Los LCGs no son santu de tu devoción.
• Si los superheroes nun son lo tuyo, eso qu’aforres 😀