Algo paecio al parte, pero pa los xuegos de mesa y rol. Vamos falar de les noticies de xuegos de mesa de la selmana 24 del 2023 (puedes atopar l’anterior equí)
Cerezo en Flor: Expansión Golpe de fé
Ficha:
- Xugadores: 2-5
- Duración: 40-50 min
- Edá: +8 años
- Editorial: Maldito Games
- Fecha: 15 de xunu
- Precio: 25€.
- Ficha BGG
Nueva espansión pal xuegu de flickeo Golpe de Fé nel qu’introducen un nuevu xugador, más cartes de llei , 2 dioses a invocar y más carauterístiques que dan más diversión al xuegu
Guerra del Anillo Juego de cartas
Ficha:
- Xugadores: 2-4
- Duración: 90 min
- Edá: +12 años
- Editorial: Devir
- Fecha: Ya en tiendes
- Preciu: 45€.
- Ficha BGG
Rescato esti xuegu que salió la selmana pasá, creo. Guerra del Anillo El juego de Cartas vien a llevar al formatu de cartes el clásicu de Francisco Nepitello (ente otros) Guerra del Anillo. Un xuegu qu’entiendo que nun sedrá tan densu como’l antecesor, pero que tien una duración reseñable. Llucha direuta ente la Lluz y la Solombra na Tierra Media.
Rol
Vamos col rol. Entamamos con Devir que ya tien a la venta’l nuevu suplementu pa Warhammmer El Juego de Rol. Ye Middenhemim La Ciudad del Lobo Blanco, suplementu rexonal ideal p’aquellos que quieran ambientar les sos partíes na ciudá de los siguidores d’Ulric. Nuevos personaxes middenheinmers, ganchos argumentales y tolo que necesites pa vivir aventures na ciudá del Llobu Blancu. El xuegu ya ta a la venta al preciu de 35€
Siguimos con Shadowlands Ediciones, onde tenemos Estirpe de Dunwich, un nuevu xuegu de rol d’edición propia nel que sedremos persones aparentemente normales na época actual, pero que tamos marcáos por Yog-Sothoth. Qué significa esto? Pues que vamos ser interesantes pa muncha xente de dudosa reputación, ya m’entendéis 😛 Sal el día 16 al preciu de 45€.
Finamos rescatando la novedá de Nosolorol qu’espublizó Villa y Corte un xuegu pa xugar a Aquellarre, el decanu de los xuegos de rol españoles, nel sieglu d’Oro Español. Sal al mesmu tiempu tanto’l llibru como la pantalla (65 y 15€ caún) Lleva’l mundiu d’Aquellarre a otra de les époques icóniques de la hestoría.
Noticies de xuegos de mesa / rol de la selmana 24 del 2023
Vamos coles noticies de xuegos de mesa y rol, y entamamos cola campaña de financiación de Witchcraft! (¡Brujería! en Castellano) un xuegu de Salt&Pepper Games que va a llevar les mecániques del esitosu ¡Resistid! a un mundiu ficticiu onde la maxa esiste. Un xuegu esclusivu pa solitario onde tendrás que prebar, derrotando monstruos, que la maxa nun ye mala sino eficaz y útil pal pueblu. La campaña ta abierta en Gamefound L’únicu pledge ye de 20€colos gastos d´’unviu a parte.
Por parte de Nosolorol tenemos la preventa abierta d’Enclaves Espectaculares, un nuevu suplementu pal sistema de 5ª edición, compatible por exemplu conel Resurgir del Dragón y demás xuegos basaos nel sistema. El suplemento ayudarate a crear espectaculares enclaves pa les tos partíes y da-yos más vides y tresfondu. El preciu la preventa ye de 60€.
Que m’entra pol güeyu de les noticies/novedaes de xuegos de mesa / rol la selmana 24 de 2023
Vamos colo que más me llama l’atención de les novedaes. Y, como lu rescate por algo, tengo claro que ye La Guerra del Anillo El Juego de cartas. Tengo nel debe’l xuga al xuegu de miniatures, y quería xugar a esti. Ya sabéis que soi fan de la saga, y el enfoque d’estos xuegos paezme mui prestosu. Si lu queréis, diriavos que nun esperaréis munchu porque ta agotáu en distribución. Yo no se si podré mercalu d’esta vegada, asina que si daquién quier prebalu y y me tien ceo pueo ser el conexu d’indies, yo encantáu 🙂
Y en cuanto al rol, volvería a escoyer el xuegu de Devir col suplementu de Middenheim. Nun tengo’l xuegu, pero un collaciu si. A ver si se digna a preparar una partía, eh? Si llee esto ya sabrá quien ye 😛
Finando les noticies de xuegos de mesa de la selmana 24 del 2023
Y na más pa les noticies de la selmana 24 del 2023, esto foi to lo más interesante que tope poles redes. De xuru hai munches más novedaes que se m’escapen, pero o nun tope información o nun tienen una fecha clara pa salir. Si me dexo alguna podéis dexámela en comentarios que gustosu l’añado al igual que si vos llama daqué l’atención.
Fontes pa la información i semeyes: