La nueche n’antes del Dia D. Salta en paracaidas tras la Muralla Atlántica d’Hitler y ayuda a les tropes del desembarcu. L’esitu de la tu misión ye clave pal futuru de la operación. Esto ye Paracaidistas en tu Bolsillo (asturianu) de Maldito Games

Ficha:

• Xugadores: 1 – 4
• Duración: 15 minutos.
• Edad: 10+
• Editau por: Maldito Games
• Autor: Emmanuel Aquin
• Ficha na BGG

Conteniu:

• 64 llosetes
• 129 cartes d’equipo
• 2 cartes de batidor
• 4 miniatures
• 19 cartes de regla opcional
• 4 cartes de recursos
• 40 cartes d’eventu
• 4 resúmenes de les regles
• 16 cartes de miembru d’operaciones especiales
• 4 cartes d’oxetivos secundarios
• 8 cartes de comandante de búnker
• 22 cartes d’escenariu.

¿De qué va Paracaidistas en tu Bolsillo?

La nueche antes del Día D, tropes americanes e ingleses fueron llanzaes en paracaidas na zona enemiga tras la Muralla Atlántica qu’Hitler puso nes sableres de Normandía. La misión d’esos paracaidistas yera tomar puntos estratéxicos enantes del desembarcu que se diba facer la mañana siguiente. Sin la toma d’eses posiciones el desembarcu taba abocáu al fracasu. Nos vamos ser un d’esos paracaidistas.

¿Como se xuega a Paracaidistas en tu Bolsillo?

Preparar la partía.

Voi describir les regles pa una partía básica. Pal modu avanzau ye lo mesmo, pero escoyendo tropa especial y un par d’apuntes qu’l manual indica perfeutamente.

Pa entamar, nel xuegu esisten 4 tipos de conxuntos, que van coincidir colos 4 palos de la baraxa francesa(corazones, rombos, diamantes y tréboles). Ca xugador va tener qu’escueyer un, y cuando se diga algo sobre’l su conxuntu, referirase a eso. Una vez lu tengamos, garramos les cartes d’evento, llocalizaciones, la miniatura y les cartes d’oxetu del su conxuntu.

Dempués, apartamos les llosetes de : Zona de llanzamientu y la que ponga’l númberu 1 deles llocalizaciones esteriores y les d’entra, batería de cañones y la númberu 11 de les d’interior. Llueu’l manual va ponete cuáles ties que retirar en función del númberu de xugadores.

Toca agora mezclar ca un la so pila de llocalizaciones esteriores y llueu mezclar conxuntamente toles llocalizaciones interiores. Una vez finemos esto, colocamos les llosetes de llanzamientu de ca xugador na posición que nos diz el manual y colocamos la nuesa miniatura na del nuesu conxuntu.

Ca xugador baraxa’l su mazu d’eventu y pon les dos primeres boca baxo sin mirales. Estes cartes nun son descartes.

Ponemos la hora na nuesa carta de recursos (07:00) y la vida inicial 6. Ponemos esta tarxeta pola zona normal, no pola zona de alerta roxa.

Coyemos l’oxetu inicial (Pistola Colt M1911) y ya podemos entamar.

Entamamos a xugar

Como n’antes, voi esplicar por enriba les regles básiques. Nel modu avanzáu son prauticamente les mesmes. Hai que siguir estos pasos:

1. Dende la posición que tamos, decidimos si nos movemos (de forma ortogonal).
2. Si nos movemos a un espaciu vaciu, garramos una lloseta al azar de la pila correspondiente (interior o esterior) y movemos la miniatura a la nueva llocalización.
3. Llee’l testu de la lloseta y aplicalo.
4. Roba una carta d’eventu y llee lo que te pon en función d’onde tes (interior, esterior o n’allerta roxa). Vamos falar mas en profundida llueu.
5. Si tes que resolver un eventu adicional, fai lo mesmo qu’el pasu anterior.
6. Resolver los eventos de fin de turnu
7. Descansar. Pues descansar descartando cartes d’eventu.

Vamos falar un poco de la carta d’eventu. Cuando descubrimos una vamos ver que tien 4 zones (esterior, interior alerta roxa y equipu). Tenemos que resolver la de la zona na que teamos na mas.

Si nos apaez un alcuentru, resolvemos el combate. Esto ye tan fácil como restar les tropes del alcuentru menos el nuesu arma. La diferencia si la hai, ye’l dañu ques faen. Tamién pues evadir que ye retirate una lloseta y perder un puntu de vida.

Si nos apaez EQUIPO, podemos robar la siguiente carta d’eventu y coyer l’equipu que nos pon.

¿Cómo se gana?

Taréis piensando… Mui guapo, pero…¿Como tengo que facer pa ganar? Perfacil. Pa ganar hai qu’atopar nel esterior el polvorín colos esplosivos, y la entra del bunker. Una vez dientro, destruir les bateríes de cañones y salir a la zona llanzamientu. IMPORTANTE una vez que destruyamos les bateries, pasamos a alerta roxa, resolviéndose agora estos eventos na fase d’eventos.

Pa perder… Tamién cenciello 😛 Loxicamente si quedes a 0 de vida pero tamién si’l reló de la misión llega a les 1000. Como dixi na preparación, entamamos a les 7, y ca vez que nun podamos robar cartes d’eventu, tenemos que volver a baraxar y mover el reló. Polo que solo tenemos dos “vueltes” al mazu.

Esto ye, por enriba, como se xuega a Paracaidistas en tu Bolsillo.

Opinión Personal

De Paracaidistas en tu bolsillo ya fici un primeres impresiones que podéis atopar equí. Vamos agora cola opinión final del xuegu. Alcordavos, que nun tien na que ver con so “padre” el D-Day Dice.

Voi entamar diciendo que la edición ta mui cuida. La caxa, los materiales to ye de mui bona calida. Por pone-y un pero, pue ser una caxa demasiao grande pa lo que trae.

Falando del xuego en si, ya veis que nun ye mui difícil de xugar, de ganar ya ye otru cantar. Son acciones cencielles, pero’l fechu de tener un temporizador fai que tes siempre en tensión, midiendo ca pasu que das porque pue ser que se eche’l tiempu encima y falles la misión.

Pese a que ye bastante cortu, a nos costonos un poco entender el manual. Xugamos la primera partía mal y dempués d’una segunda lleida ya lo ficimos bien. Lo que si pueo dicir ye que, como auguraba, col modu avanzáu y les unidaes especiales el xuegu gana munchu mas pesu. Nun toles unidaes faen lo mesmo, añades misiones secundaries que tienes que facer pa ganar y llueu escenarios históricos que pues revivir y que dan mas cosines al xuegu.

Otra pega que podemos pone-y ye, quiciabes, el preciu. Si nun recuerdo mal anda por unos 45 o 50 euros. Los componentes son de bon material, pero nun se yo si ye un pelín eleváu. No obstante esto ye lo de siempre. Si lu xuegues muncho, salte baratu. Sino… No tanto.

Pero pa mi lo más importante ye que me mete na partida y no que facien aquellos soldáos en 1945. Nun vos voi negar que yera escépticu, al final ye mover una piezuca de maera por llosetes. Pero esi agobiu, el reló corriendo, la incertidumbre de si das coles coses a tiempu. To eso ye lo que yo-y pidía al xuegu, y el xuegu me lo da camuflau en regles cencielles y de poco tiempu de xuegu.

Resumen final

Pa mi, que to esta época dela historia me parez mui interesante y qu’encima fui a les sableres de Normandia especificamente a estes coses, el xuegu cumple con to lo que-y pido y nun m’arrepiento na de trayelu pa casa. No obstante, como siempre equí vos dexo’l resumen.

Paracaidistas en tu bolsillo va prestate si …

• Afayate los temas de la Segunda Guerra Mundial y tolo atontecío nel Dia D.
• Quies un xuegu cenciellu y cortu, pero que te tresporte a esa época.

Paracaidistas en tu bolsillo nun va prestate si …

• Busques un wargame, nun lu vas topas ni s’acerca.
• El preciu un poco eleváu ye un inconveniente
• El Desembarcu ni te va ni te vien.