Entama nel negociu ferroviariu, merca aiciones y fai que les tus compañíes seyan lo más valioses posible pa ser el ganador. Primeres impresiones de Mini Express un xuegu d’estratexa que nos trai en castellán Delirium Games

Asturianu

¿De que va Mini Express?

Tamos nos entamos del sieglu 20, les compañíes ferroviaries tan n’auxe. Siendo más precisos, hai cuatro empreses que s’están llevando’l pastel. Si nun quies que se te pase esi tren, nunca meyor dicho, ties que mercar les aicciones bien e intentar que la influnencia d’eses compañies medre pa qu’eses aicciones valgan más, y por ello seyas más ricu.

Mini Express ye un xuegu d’estratexa que podemos dicir que ye de tipu ecónomicu pese a que nel xuegu nun hay perres. Merca les aiciones nel momentu xustu pa que nun se devaluen y fai crecer la influencia pa encarecer les que ya tienes.

Primeres impresiones de Mini Express

Prestame cuando voi de viaxe dar una vuelta poles tiendes de la zona per onde viaxo, y ya si pinta mercar dalguna cosuca. Esti xuegu concretamente traxelu del viaxe que fici fai poco. Nun tenía constacia d’él, si que me sonaba de velu poles redes pero nun sabia de que diba ni na, y dempués d’entrugar al dependiente decidime por él.

Dicir, ante to, qu’estes primeres impresiones escriboles tras d’una sola partía y contra l’autómata. Direisme, a rapaz… Asina nun vas saber cuan de bono ye’l xuegu, y de xuru tenéis razón. Pero n’estes feches nun me cuadra quedar con collacios pa xugar, toca xugar solu.

Partía cola idea inicial de que’l xuegu yera algo paecío a Aventureros al Tren, o que se podía asemeyar. Pero polo que pudi ver solo se paez nel tema y ni eso si m’apuráis. El xuegu trata de mercar aiciones de compañies ferroviaries (4 en total) y facer que la nuesa influencia medre pa qu’eses aiciones pesen más. Si consiguimos posicionamos bien y tener un bon númberu al finar la partía van danos munchos puntos. Esto vamos facelo auniendo ciudaes y llegando hasta unes fiches d’influencia que tan n’estes. Pero caro, nun podemos facelo al gusto, vamos venos supeditaos a la cantidá de trenes qu’haya de la compañía qu’escoyamos ampliar la rede. Si nun hai trenes suficientes, vamos tener que mercar aiciones pa que se construyan mas trenes.

Esto ta mui bono, como dixi n’antes a mas aiciones tenemos más puntos al finar la partía. Pos si y non… Porque si merques aiciones, tamién baxa la to influencia sobre la empresa en cuestión. Tantes unidaes como trenes tuviera nel momentu que mercasti l’aición. Esto fai que tengas que definir bien la estratexa, cuando mercar aiciones y ganar la influencia nel momentu xustu, pa posicionar eses empreses y consiguir que les nueses aiciones seyan les que más valen. Esta xestión económica, sumá a les regles carauterístiques de coneutar dos ciudaes dexome un bon regustu, que dame la sensación que gana con mas xente na mesa.

L’autómata ye mui cenciellu de xugar, son unes llosetes que te van diciendo que compañía ye la escoyía pol autómata nesi turnu y dende que ciudá parte pa construyir les vies. En función de los trenes que tenga la compañía escoyía, merca aiciones o construye vies. Costome un par de turnos garrar el tranquillu al autómata, pero llueu va voláu.

Pa finar.

Polo xeneral presetenme los xuegos económicos. Los que pudi xugar que son l’Alta Tensión, más veces, y el Brass , creo que solo una, gustaronme. Pero son xuegos que polo xeneral nun suelen funcionar bien a dos, puen xugase y esfrutes pero a más xugadores la esperiencia ye más afayaiza, y dende llueu nun se puen xugar en solitariu. Asina qu’esti tenga esa opción prestome munchu y foi na de les coses po les que me decantie por él.

Nun m’arrepiento pa na tres de la primera partía. Una vez qu’arranques ye cenciellu de xugar y veolu con muncha profundidá. De xuru qu’a más xugadores gana, pero col autómata solu yo veolu esfrutable perfeutamente. Quiciaves una bona toma de contauto pa xuegos un poco esixentes, pero que pa los que ya tengan recorríu n’esto de los xuegos de mesa pue prestayos perfeutamente.

Yo voi da-y más partíes, solu y espero engañar a la moza a ver si se sienta a xugar conmigo. Hai posibilidaes, el xuegu nun dura demasiao, en menos d’una hora ya lu xugaste, polo que ye fácil que lu podamos sacar y xugar. Pero como vos digo, tamién solu. L’autómata pegome una tunda estupenda y tengo que vengame, más pronto que tarde jaja.

Y na más n’estes primeres impresiones de Mini Express. Se qu’una sola partía ye mui pronto pa xuzgar na, por eso nun entre muncho n’estes primeres impresiones, pero como dixi tengo ganes de volver a xugalu y eso ye un puntu al so favor. Veremos na futura entrada de Falando de… Si caltengo les sensaciones.