El destino de la galaxa ta nes tos manos. Sirvirás al Imperiu o alistaraste nes combatives tropes rebeldes. En Star Wars The Deckbuilding Game (asturianu), nos enfrentaremos al otru bandu pa ver quien controla la galaxa. El caberu de los xuegos de mesa de Star Wars que nos trai Fantasy Flight Games

Ficha:

• Xugadores: 2
• Duración: 30 min
• Edá: 12+
• Editáu por: Fantasy Flight Games
• Autor: Caleb Grace
• Ficha BGG

Conteníu

• 10 cartes d’aniciu Imperiales
• 10 cartes d”aniciu Rebeldes
• 90 cartes de galaxa
• 10 cartes de piloto del Borde Exterior
• 20 cartes de base
• 1 mididor d’Equilibriu de la Fuercia
• 50 contadores de daño
• 20 contadores de recursos
• 1 indicador de la Fuercia

¿De qué va Star Wars The Deckbuilding Game?

Fai munchu tiempu, n’una galaxa mui mui ñoñe… Toles películes de la saga entamen con esta introducción, esti xuegu nun diba ser menos. En Star Wars The Deckbuilding Game encarnaremos la llucha ente L’Imperiu Galácticu y L’Alianza Rebelde de les clásiques películes de Star Wars. ¿Consiguirán los rebeldes desarbolar el poderosu Imperiu?¿O sedrá esti quien nun de nenguna oportunidá y fine cola amenaza rebelde?

Star Wars The Deckbuilding Game ye un xuegu d’enfrentamientu pa dos xugadores qu’utiliza les mecániques de construcción de mazos. Debes d’aprovisonate de les meyores tropes pa consiguir derrotar les bases enemiges, asina como tola flota que la defendan. Vamos ver como se xuega y l’opinión final.

Como se xuega

Preparación

Pa la preparación de la partía vamos desplicar como se fadría pa la primera de les partíes. Pal restu fadrás de la mesma manera, pero con más bases.

1. Lo primero sedrá escoyer que faición vamos controlar. Imperiu Galáctico o L’Alianza Rebelde
2. Coyeremos les 5 bases iniciales (toes nel modu completu) y pondremos l’inicial en xuegu (nel modu completu la qu’escoyamos)
3. Ca xugador coxe les sos 10 cartes d’aniciu, baraxa y ponles xunto a la base.
4. Baraxamos les cartes de galaxa, y revelamos 6. Les cartes que pertenecen a una faición, ponense mirando pal xugador d’esa faición. Colocamos tamién les 10 cartes de pilotu nel estremu opuesto del mazu
5. Ponemos tolos contadores al alcance de los dos xugadores, y colocamos el mididor de fuercia col so marcador nel estremu de la lluz.
6. Robamos ca xugador 5 cartes

Y llisto, ya podemos entamar a xugar!

Como se xuega a Star Wars The Deckbuilding Game

Vamos col desendolcu de la partía, vais ver que nel manual paez qu’hai munches páxines, pero ye cenciello de siguir.

Lo primero qu’hai que facer durante’l nuesu turno ye mirar si tenemos una base activa. Si non, tenemos que mirar na nuesa reserva y escoyer una. Esto fai que solo nos puen destruyir la base una vegada por turnu. Tres d’esto, ya entamamos cola secuencia habitual de xuegu. Tamién coyeremos un recursu si’l mididor de fuercia ta nel estremu del llau de nueso. Describiré les aicicones disponibles, que podremos facer el númberu de veces que queramos y/o podamos.

Xugar una carta.

Lliteralmente eso, xugaremos una carta de la mano. Baxáremos la carta a la mes ay coyeremos los recursos indicaos (iconu de caxina) y moveremos el track de Fuercia tantes posiciones al nuesu llau como indique (iconu de sable de lluz)

Adquirir una carta.

P’adquirir una carta, gastaremos tantos recursos como’l coste. Destacar que solo podemos mercar martes de la faición de nueso y neutrales. Como en tolos deckbuilding salvo que s’indique otra cosa, la carta dirá pal descarte e inmediatamente rellenaremos la llinia de galaxa.

Usar la capacidá d’una carta.

Si quies, pues resolver les capacidaes d’una carta. L’habilidá solo se pue resolver una vegada por turnu. Pa indicar que la usamos, xiramosla.

Asinar cartes pa un ataque.

De les cartes que xugamos, podremos atacar coles que dispongan de valores d’ataque, pa ello tenemos qu’asinales. Ca carta solo se pue asinar a un oxetivu. Esto fai qu’el dañu sobrante nun se puea redirixir.

Los oxetivos puen ser cartes de la faición rival de la llinia de galaxa, un sabotaxe o cacería, superando’l valor del llau que mira pa nos. O un ataque a la base rival.

Resolver un ataque

Ye l’hora de repartir daños. Nos casos de la cacería o’l sabotaxe, si consiguimos superar el valor, eliminaremos la carta de la fila y cobraremos la recompensa. Ties qu’eliminar la carta nel mesmu turnu, si non esos daños pierdense. 

Nel casu d’atacar una base rival, primero ties que destruyir toles naves de llinia que la protexen. Si una vegá destruyís sobren daños dirán pa la base. Si destruyía la base siguen sobrando, pierdense.

Finar Turno

Esta sedrá l’última que fadremos nel turnu. Descartaremos toles unidaes, menos les naves de llinia que se quedarán protexendo la base. Llueu eliminamos toles cartes que nos queden na mano y robaremos 5 cartes.

Cuando se gana

La partida fina nel momentu que se destruyan 3 bases rivales, 4 nel modu completu.

Opinión final de Star Wars The Deckbuilding Game

Vamos cola opinión de Star Wars The Deckbuilding Game. Si vos alcordáis, ya falé d’él n’unes primeres impresiones asina qu’igual nun vos garra de nueves. Tamos ante un xuegu de tipu Deckbuilding pero nesti casu (y dixebrao d’Ascension) ye d’enfrentamientu direutu. Quiciabes nesi sentíu parezcase más a Star Realms, pero caro, vistilo de Star Wars lluz más.

Mecániques

Caleb Grace ye un diseñador famosu nel llugar. Ta detrás del desarrollu del meyor xuegu que se pudo crear, El Señor de los Anillos LCG, y tamién del Marvel Champions asina que me vengan a la tiesta. Sin embargu, nesti casu nun ye qu’anové especialmente nenguna mecánica, salvo’l tema de lo que pues mercar y destruyir. ¿Paga la pena entós si solo cambia eso? Yo diría que si. Esi cambiu ye lo suficientemente atrautivu pa facelu diferente. Prebar les dos faiciones, la “interacción” col rival nel modu que ties que destruyilu, pero tamién a l’hora d’eliminar les cartes que solo él pue mercar. Creo que-y siente per bono.

Como dixi antes, prebar les dos faiciones tien su aquél. ¿Por qué? Pues porque de primeres no paecen tener poderes especiales, pero si que les cartes d’una u otra manera se diferencien. L’Imperiu, una maquina de destrucción, y L’alianza pues más con sabotaxes, ataques a pequeña escala… Esto failo, previo piensar que nun lu sedría munchu, un xuegu temáticu. Ca faición fai lo que meyor sabe facer. Por supuesto, narrativa brilla por su ausencia. Eso sí, de bones a primeres y tres de varies partíes, paez qu L’Imperiu ye un pocu más poderosu qu’el llau lluminosu. Entiendo que se quier paliar col marcador de Fuercia inicial del llau de la lluz. Y a colación d’esto, el nuevu “recursu” de la Fuercia. Munches cartes fadránse más poderoses si la Fuercia ta del so llau. Más interacción na llucha por esi track.

A trozos

Como vien siendo habitual na casa, el xuegu ta, por dicilo d’alguna manera, cortáu. Si bono ta basao no socedío (más o menos) nos episodios IV a VI y Rogue One, personaxes tan icónicos como los androides, o los ewoks nun tan incluyíos. Dalo que da que piensar que puen venir n’una nueva espansión. Ye d’entender que quieran meter espansiones, pero nun sé… Personaxes tan míticos d’eses películes nun vengan…

Producción

Ya en temes de producción, les cartes tan bastante bones. Lo que nos tien acostumbraos Fantasy Flight. El xuegu vien con un insertu, pero’l problema ye que si quies meter les cartes enfundaes creo que nun entren. Tamién sedría meyorable’l tableru de Fuercia, ya que’l grosor ye poco más qu’una carta normal. En cuanto a les semeyes, si que nun hai quexa. Semeyes vistoses y toes correutes. Nesi aspeutu, si qu’hai un bon trabayu.

Resumen final

Vamos col resumen final de Star Wars The Deckbuilding Game n’asturianu, un xuegu de construcción de mazos y d’enfrentamientu, que cuando salió la comunidá realmente taba esperando’l LCG cooperativu. Un xuegu de fácil accesu, nel que pues tar xugando rápido, ya que l’esplicación como vistéis ye rápida. No incorpora na mui novedoso, pero lo que mete col tema de Star Wars sienta-y como un guante. Un exemplu los sabotaxes y/o caceríes y solo mercar cartes de faición. Esto fai que seya un xuegu temáticu pero no narrativu, algo que suel ser habitual nos xuegos d’enfrentamientu. Amás tien el so nivel d’estratexa a l’hora d’enfocar les cartes que merques.

Tamién, y a diferencia de xuegos del estilu, añade un nuevu “recursu”, la Fuercia que pue ser diferencial a l’hora de plantegar estratexes, ya que munches cartes tienen sinerxia. Veolu un xuegu rexugable, hasta ciertu puntu. Pue xugar coles dos faiciones, facete a ca una y utilizar diferentes bases. Pero llegáu’l momentu quiciabes quemes el xuegu. Son 90 cartes y dando-yos munches partíes terminarás por conoceles toes. Anque si ye verdá que nuna mesma partía ye complicao veles toes. Enr elación a esto ye un xuegu “partíu”, quiero dicir, va tener espansiones. Dalgo ya habitual na editorial.

Mirando pa la producción, si bono les semeyes y demás paecen de bona calidá, creo que se podría facer meyor dalgunos aspeutos, como por exemplu’l track de fuercia o l’insertu. Sobre to lo primero. Al final, lo caro del xuegu ye la llicencia. son 40€ por poco más de 140 cartes y dalgún conador. Nun digo que seya caru, pero quiciabes en dalgunos materiales podía vese reflexáu esi preciu.

Finando

Faciendo balance de to, a mi ye un xuegu que personalmente prestame. Los fans de la saga creo que lu esfrutamos pa da-y partíes esporádiques al salir fácil a la mesa. Creo que consigui esa tensión ente los xugadores, como nes películes en L’Imperiu y L’alianza. Con coses meyorables, por supuesto, pero creo que ye un bon productu. Solo nos faltaría ver cuanto de cares sedrán eses espansiones y va venir.

Star Wars The Deckbuilding Game va prestate si…

• Quies un xuegu de Star Wars
• Busques un xuegu pa dos xugadores d’enfrentamientu
• Saber, que pese a que yefuncional, te van a salir espansiones
• Prestente los deckbuilding

Star Wars The Deckbuilding Game no te va prestar si…

• Nun te gusta’l tema de Star Wars
• Nun te presta’l deckbuilding
• Non te gusten los xuegos d’enfrentamientu direuto.
• Nun quies xuegos con futures espansiones.

Y na más por güei ¿Xugasteis a Star Wars The Deckbuilding Game? ¿Qué vos paeció? ¿Xugastéis a más xuegos de la temática? Contame nos comentarios! Gracias por lleer!