Llevaba tiempu siguiendo-y la pista a esti xuegu, que según lleí yera un “Anillo Único Llixeru” Na más que tuvo pa salir merquelu (bono pol momentu solo lu tengo en PDF pero ta al llegar). Sin facevos esperar más, vamos falar d’esti World of Fantasy d’El Refugio Editorial n’asturianu

Tuvi la sorte de que l’autor del xuegu, Dani Vicente (Vetustos del Rol), me dirixera una partía d’ El Anillo Único (anque de la primera edición). Como me presto la so manera de llevala, cuando m’entere qu’andaba preparando esti xuegu y que lu esta testeando, tuvi sollerte pa ver cuando s’espublizaba. Asina que na más que paso merquelu y tuvi accesu al PDF pa poder lleelu. Vamos ver que me paeció.

Edición física de World of Fantasy

Como vos dixi enantes, nun tengo tovía l’edición física del llibru. Tuvi accesu automáticu al PDF. Comentavos un poco per enriba como ta estructurao y demás. Y ya cuando lu tenga na mano actualizavos.

El xuegu consta de 64 páxines en blanco y negro en rústica con grapa. Ta escritu completamente, creo, a una sola columna faciéndose, pa mi al menos, mui fácil de lleer. Nun tien munches ilustraciones, anque les que tien van acorde col aspeutu xeneral del llibru, que nun destaca munchu. Creo que lo que s’escoyo ye que seya m´sa accesible. Y anque seya solo nel preciu (l’otro ya veremos) ye bastante competitivu. Por contra, la portá si que me paez mui guapa.

Ambientación de World of Fantasy.

Per esti apartáu voi pasar mui rápidu. Si vien nes regles y sistemes dase un aire a El Anillo Único… World of Fantasy foi pensáu pa poder xugar con cualquier ambientación de fantasía. Da fechu les premises del llibru ye que pueas coyer cualquier aventura que tengas per casa y la puedas adautar al sistema de forma cenciella.

El sistema de World of Fantasy.

Como comenté enriba, el sistema tien similitues, ente otros, col Anillo Único. El propiu autor fala d’elles na páxina de la editorial anque esta que yo comentó nun la noma. Pero a mi los tres atributos, el tema de los viaxes, e incluío un poco’l tema de la carga, la salú y l’espiritu, asentamientos y demás son referencies, pa mi, al xuegu basáu na Tierra Media.

El sistema en sí ye per simple, toles tiraes son de dos dados de 6, y en función del resultáu fallamos, acertamos completamente o no tanto. Esplicome. Equí faese una especie de simbiosis Direutor-xugador, quiciabes alterando un poco los “roles” de la fantasia clásica. Equí en función de la tirada sueles tener una consecuencia. Pero ye‘l nivel d’esa tirada quien dictamina quien escoge esa consecuencia. Si falles, el direutor aplica la consecuencia (desfavorable obvio), pero si nun aciertes del to apliquesla tu la consecuencia desfavorable (consensu col direutor claro ta). Ye más, si la tirá sal mui bona, el xugador escueye una consecuencia favorable. La tira ye básicamente, tirar 2 dados de 6 y sumar la puntuación d’un de los atributos básicos (van dende -2 a +1)

No obstante, y pese a to, el xuegu busca primar la narrativa. Dexando les tiraes pa situaciones que realmente supongan un retu o peligru. Faciendo asina fluir munchu más áxil l’aventura. Al mi modu de ver, el xuegu ta pensáu pa que ni la so llectura ni l’entamar a xugar si dilate nel tiempu. Ta fechu pa que den ganes de xugalu, acortando la, a vegaes, pesá ficha de personaxe o regles mui al detalle que te faen dir al manual una y otra vegada. To con regles cencielles, que fomenten los momentos narrativos y dexando a los daos el protagonismu de momentos épicos o de situaciones divertíes en formes de consecuencies ente los xugadores.

Toca dicir que pese a lo cenciello, nun perde versatilidá. Tel xuegu podemos atopar toles coses de los xuegos de fantasía clásicos. Como la maxa, que si bono nun hai fechizos de por si, insta al xugador a dicir la so especialidá y como la canaliza, d’onde vienen esos poderes etc. Tamién los compañeros animales, pa echar un gabitu al xugador qu’acompañe. Y ya pa finar, tamién se ve na opción de poder adautar cualquier aventura de cualquier xuegu de fantasia. Obvio que nun lo prebe a facer, pero daes unes pautes cencielles el cambio paez rápidu. Si esto nun te presta, el propiu llibru te da les pautes pa construyir una aventura.

Opinión final.

Vamos cola opinión de World of Fantasy. Esti cenciellu y versatil xuegu de fantasía xenérica nel que nes al rodiu de 70 páxines condensa tolo necesario pa xugar una bona aventura de fantasia. Si te presta’l mazmorreo. Los viaxes… Tamién. Siendo francos, el xuegu nun ye’l más guapu que vayas a ver, pero, y equí ya elucubro yo, nun creo que fora l’idea del creador cuando lu fizo. Buscaba un xuegu cenciellu, versatil y rápidu d’aprender y xugar. Y yo creo que lo consiguió. Creo ye una alternativa más rápida a xuegos xenéricos de temática fantástica como pue ser Pathfinder Salvaje, pero con una forma totalmente dixebrá de plantegalo, siendo World of Fantasy más cenciellu que nun peor.

Si tuviera qu’escoyer ente los dos xenericos que falé nel blogue, escoyería Pathfinder pa temas más mazmorriles (si quisiera sensaciones paecies a D&D, anque más “salvaxes”) y World of Fantasy, si quiero una partida más cenciella del Anillo Único o xuegos pol estilu. Lo que si pueo dicir, ye que merqué’l xuegu pol autor, y nun m’arrepiento na d’ello. Una bona opción pa entamar nos xuegos de rol narrativos y pa los que no entamen tamién, que narices.

¿Probasteis el xuegu? ¿Conocéis dalgun similar? ¡Dexamelo en comentarios!