Col motivu de la campaña de Depues d’ Ochobre: Perestroika, qu’actualmente tenemos en Verkami, traemos esta entrevista a Nicolas Bardio, l’autor d’esti, el primer xuegu de rol n’asturianu, que lleganos nesta “segunda edición” con más conteníu y ampliando la domina de los años.

Lo primero de to ye da-y les gracies a Nicolás por atendenos, esta y la milenta vegaes que-y preguntamos :). Ya nun vos entretengo más y dexovos cola entrevista de Depués d’Ochobre: Perestroika, l’edición definitiva del primer xuegu de rol n’asturianu.

Lo primero, bones tardes y munches gracies por atendenos otra vegada más. Paez mentira, pero ya
pasaron 5 años dende’l primer xuegu publicáu n’asturianu, que precisamente foi Después d’Ochobre. A
más, al rodiu d’él, xurdió la Editorial Radagast. Como valorais el medru dende antes a güei?

La verdá que daquella sorprendiónos l’acoyida. Foi gracies a esi escesu de recaudación que fuimos quien a montar la editorial y enantar el campu de les lletres asturianes. Sagues de fantasía, xuegos de rol, noveles pulp, fantasía épica y urbana, ucroníes, noveles de terror, un western, mitoloxía en plan de coña, una novela sobre robós humanos… Nun había nada de too esto. Sacantes Dolfo Camilo y Vicente García Oliva taba too ermo. Y agora la fantasía ye’l xéneru más publicáu n’asturianu. Nun creemos que vaiga durar eternamente, yá daquella nun lo pensábemos y llanzámoslo como la “década fantástica”, tamos nel ecuador y toca facer balance. Agora’l retu ye renovanos.

Entamamos ya a falar del xuegu, Depués D’Ochobre Perestroika.Según pudimos lleer, ya una
segunda edición de l’orixinal. Pa los que nun coñuezan Depués d’Ochobre…¿Qué ye?

Depués d’Ochobre son dos coses: una, ye un xuegu de rol. Dalgo que, dicho seya de pasu, nun me paez que tenga demasiáu ésitu n’asturianu. Somos pocos los asturfalantes y menos tovía los roleros. La otra, y esa sí que tuvo una gran acoyida, Depués d’Ochobre ye una ambientación d’una Asturies alternativa, un universu compartíu, un mundu grande que detalla y desplica’l xuegu de rol de Depués d’Ochobre, y nel que se desendolquen noveles como La Colomina 36, Interferencies nel Akula o cómics como Fame & Gatos. Una persona que merque Depués d’Ochobre va llevar pa casa un xuegu de rol col que facer hestories d’espíes, sí; pero tamién va llevar un tresfondu completísimu de cómo ye la realidá paralela na qu’Asturies gana la so revolución del 34 y forma parte de la URSS.

Según pudimos lleer , n’esta segunda edición, ampliase’l tresfondu y ameyoronse o axustense
dalgunes regles. ¿Podéis contanos un poco más d’esi tresfondu y modificaciones?

Cuando publicamos Depués d’Ochobre quiximos ser mui exhaustivos colo que pasó n’Asturies. Nun valía que fore una hestoria o un cuentín del tipu “En 1934 ganó la revolución y entramos na URSS, en 1941 invadiéronnos los nazis, en 1956 fixeron una central nuclear…” Queríemos detallalo too: cómo pensaba la xente, qué llibros lleía, qué pelis echaben nel cine, qué comíen, qué bebíen, ú diben de vacaciones, qué facciones había na UHP (el Partíu Únicu), qué astronautes asturianos había,
cómo’l rusu influyía y facía un “amestáu” col asturianu… too. Quiximos poner un nivel de detalle mui grande y daquella detallamos con esi nivel de detalle’l periodu 1934-1970. Agora vamos un pasu más, reeditamos too aquello, pero col periodu 1970-1991 que tien pila coses interesantes. Ye’l tiempu de la Perestroika, de Star Wars, de les películes de superhéroes de los 80, del tetris, de l’apertura, del VIA y de mil coses más… Quiximos imaxinar esa asturies setentera y ochentera con figures de la dómina, imaxinando cómo seríen nesti universu paralelu. Vamos ver a Tino Casal, vamos ver a De Lorenzo, que tien un rol destacáu, vamos ver a Areces, a Nuberu, a Conceyu Bable… pero dende otra perspeutiva, totalmente ficticia.

Depués d’Ochobre nun yena más un xuegu de rol, tan al rodiu delles noveles ambientáes n’esi
mundiu. Pero… que foi primero, noveles o el xuegu. Como xurdió la idea?

Lo cierto ye que la idea surdió nun entamu como una triloxía familiar. Yo quería facer trés noveles, una de la Revolución, otra de los años 70 y otra de la cayida del muru. Comentélo a familia y amigos y toos pensaron que yera una llocua y qu’eso nun-y interesaba a naide. Conque escuchélos y decidí facer un xuegu de rol. La cosa ye que cuayó, y cuasi acabó cuayando hasta más la novela, “La Colomina 36”, que va pela tercer edición. En verdá “La Colomina 36” yera la segunda de les trés noveles que quería facer orixinalmente. Les otres nun les fixi… …y dame que nun les voi facer.

La primera edición foi un ésitu, más de 12000 € recaudaos de los 2500 que se pidíen. D’aquella, ya
teníais na tiesta que l’universu medrase o foi dalgo que xurdió debio al ésitu del xuegu.

Foi mui prestoso. Teníemos munches idees, sí. Pero daquella hebo tantu hype qu’acabó surdiendo una especie de diálogu ente creadores y públicu. Dalgo que nunca se diere primero na lliteratura asturiana y, tristemente, tampoco se dio depués. La xente participaba en retos que teníemos nes redes sociales como facer el “#microrrellatusoviéticu” o sacase semeyes con elementos rusos. D’ellí surdieron idees como que los que ganaben o participaben, col so permisu, usalos como personaxes.
Llevámoslo tamién al verkami. Munchos personaxes que salen en Depués d’Ochobre, científicos de los años 60, xenerales soviéticos de los 40, espíes condecoraos de los 50… Son en verdá persones de carne y güesu que tán vives na Asturies actual. Foi mui prestoso.

Agora mesmo nun ta disponible, pero… Piensastis en dar l’opción a los nuevos xugadores d’acceder
a conteníu de la pasá campaña, como por exemplu Oxetivu Matar a Franco?

Nun tuvo munchu ésitu Matar a Franco. En verdá fixímoslo cuando vimos que la cosa marchábanos de les manes y venía peña de fuera d’Asturies; pos de mano pensamos que namás interesaría a la xente d’equí. Pensamos qu’una hestoria ambientada na España franquista podía interesar fuera pero nun tuvo mui bona acoyida. Quiciabes nel futuru saquemos un volume d’aventures onde taría
Matar a Franco pero tamién más coses. Hai munches hestories que tenemos yá escrites, que surdieron depués, xugando en distintes meses y dalgún acabó escribiéndoles. Non toles hestories son míes, yá en 2019 había un par d’hestories d’otros dos autores, y la cosa sigue. Depués d’Ochobre ye un universu compartíu como digo.

Esiste la posibilidá de que los que tengan la primera edición, puedan acceder a conteníos como’l
tresfondu añadíu o solo se pue mercando la segunda edición?

Tuvimos esa dulda: ¿Reeditamos DDO y sacamos un tresfondu nuevu? ¿O facemos lo que fiximos? La verdá qu’al final decidímonos por facelo too xunto porque más que como una espansión plantegámonos ésta como una “edición definitiva”. Nun va a haber tercera edición de Depués d’Ochobre. Si sigue habiendo demanda, habrá más hestories, quiciabes tresfondos pa otros llugares como Cataluña (que na nuesa ucronía acaba dividida en dos). Pero queríemos qu’esti fore’l llibru definitivu, dalgo canónico en cierta manera: Nun va cambiar una coma del tresfondu 1934-1991, y, pa detrás, queríemos sacalo a color. La otra vez nun lo fiximos porque yéremos nuevos nesto de la edición, de los presupuestos, de les imprentes… Agora sabemos que podemos facelo a tou color, pensamos que gana, y queríemos facer una edición definitiva. Yo creyo que paga la pena tenela, si te
presta Depués d’Ochobre, claro.

Con Depués d’Ochobre marcose un fitu, el primer xuegu de rol n’asturianu. Tres d’él vinieron, al
menos, dos más 1984: Thoughtcrime, el xuegu de rol de la novela d’Orwell tamién vuestru y Caída’l
Infierno que también participes na traducción. Como veis esti mercáu de xuegos de rol n’asturianu? Veis
posibilidá de medrar?

Véolu mui llimitáu. Como comentaba enantes, la mayoría de la xente que mercó Depués d’Ochobre fíxolo pola ambientación más que por depués xugar a él. Nel casu de 1984 les ventes n’asturianu foron mui llimitaes (y eso que 1984 ta tornáu al asturianu con una escelente versión de Xesús González Rato). El rol n’asturianu ye más un actu de militancia. Tamién me consta qu’hai muncha
xente que tien Depués d’Ochobre y nun xugó, y tien ganes de facelo. Hai poques posibilidaes de xugar al rol n’asturianu. Creyo que ye daveres la nuesa asinatura pendiente, tenemos una canal de Discord “Conceyu Rol”, pero nun tamos mui activos porque somos los que somos y polo xeneral tamos a mil coses.

Y vamos finando per equí, ¿Hai dalguna cosuca que queráis cuntíanos que vos pareza interesante o
vais colgar dalgún video dalguna partida o asemeyao?

La verdá que si mos conviden a dalguna canal ensin problema montamos partida de rol. Nosotros na editorial nun tenemos streaming nin nada como tal, conque nun tendría munchu xacíu. Pero tamos abiertos.

Na más por güei, espero vos prestare l’entrevista tanto a nosotros facela y volver a da-y les gracies a Nicolas, y tol equipu de Radagast, pol tiempu y siguir sacando conteníu n’asturianu. Un saludin!