Esti sabadu 17 d’avientu na Universidá Llaboral de Xixón, celebrase la convención d fantasia asturiana durante tol día. La xente qu’organiza, tuvieron a bono contrestame unes entruguines que-yos fici, do-yos les gracies dende equí. Pero nun m’enrollo más. Dexovos cola entrevista l’AsturCON 2022 (asturianu)

1.-¿Quién ta detrás d’AsturCon y como xurde l’idea?

Pos somos un autor en castellanu, ún n’asturianu y un ilustrador, a los qu’un día falando en chigre ocurriósenos facer un alcuentru ente autores, editoriales y públicu asturianu. Vinímonos arriba, llamemos a los editores y autores que conocíemos, estos llamaron a otros, y nunos díes yá teníemos too en marcha. 

2.-¿Que podemos atopar na AsturCon?

Sobre manera, vais pasalo bien. Tenemos meses nes qu’aldericar sobre temes rellacionaos col xéneru, cites rápides coles editoriales pa que presentéis les vueses noveles, una esposición… Too condensao nun día porque nun sabíemos que rempuesta diba haber, pero agora tenemos claro que pal 2023 vamos facelo pelo menos dos. 

3.-La lliteratura de Fantasia, n’asturianu y en castellan, escrita n’Asturies paez que ta en crecimientu. ¿Creyéis qu’hai munchu que dicir tovia, y marxe de crecimientu, o que yá se tocó techu y hai que caltenelu? 

Esto acaba d’empezar. Esti ye’l primer añu nel qu’hai más narrativa n’asturianu de xéneru fantásticu que realista, pero tenemos conocimientu de que pal añu qu’entra va haber muncho más. Munches más obres y autores que debuten. 

4.-N’AsturCON tais dexando espaciu pal rol, n’Asturies actualmente nun tenemos munchos xuegos de rol de fantasia, o no que nos conozamos, creyéis qu’esto va cambiar nun futuru cercanu? ¿Cuales os gustarían que fueran los siguientes pasos que se diesen en esti sentiu?

Dexamos espaciu pal rol porque entendemos que’l rol ye tamién lliteratura y narrativa al mesmu nivel que los relatos o les noveles. Lo anormal sedría nun contar col rol nun eventu dedicáu a la lliteratura de fantasía cuando la mayor parte del rol que s’edita nel mundu ye de fantasía.  N’Asturies en castellanu HT Publishers tien una cantidá de xuegos de rol de fantasía bien importante como, por casu, Savage Worlds o, más de recién, Scherezade. Los qu’hai n’asturianu, 1984:Thoughtcrime y Depués d’ochobre, son más thriller que fantasía, pero cónstanos que ta en formientu dalgo mui gordo. 

5.- ¿Qué oxetivos esperais consiguir con les xornaes?

Lo primero, conocenos unos a otros, crear una rede ente autores y editoriales. Paez haber especial distancia ente la lliteratura en castellanu y asturianu, abulten dos mundos distintos, pero nun tenemos mieu a atopar una bona hestoria seya na llingua que seya. 

6.-¿Qué opinión teneis del rol? ¿Creeis que sigui estigamatizao o que ya superamos esa barrera? ¿Tenéis daque esperiencia con dalgún xuegu? ¿Cual ye’l vuesu favoritu?

(Xon) Quiciás porque yo entamé a xugar al rol nos Estaos Xuníos nunca tuvi una idea negativa del rol nin me paeció que se viera como dalgo dañible. Sí ye verdá qu’a finales de los 80 víase como dalgo marxinal, de nerds. La prollongación perfeuta del mundu nerd qu’habitaba nos comics y na lliteratura fantástica. Foi nos 90, n’España,  cuando fui consciente d’esa negatividá haza’l rol. Anque la verdá ye que pa entoncies yo yá nun xugaba. Solo xugué a Advance D&D (2nd edition) asina que solo puedo recomendar esi.

(Adrián) La imaxe de los xuegos cambió muncho nos últimos años, yo recuerdo qu’un amigu nun quedó a xugar porque dicía que so ma nun-y dexaba porque yera illegal y peligroso. Tengo xugao al Dungeons, a La llamada de Cthulhu, a In Nomine Satanis/Magna Veritas… Pero tengo un ciñu especial a Superhéroes Inc., un xuegu español que compré de mui ñeñu. 

7.- ¿Y nos xugos de mesa tenéis daqué esperienca? ¿Cual ye’l favoritu?

 (Xon) Anguaño en casa tengo munchos de mesa (Risk, Monopoly..etc) xuegos colos que xugaba de neñu y colos que xugué colos mios fíos cuando yeren más neños. Anque reconozo que nun tengo nengún xuegu de rol en casa nin fui quién a meter a los fíos por ellos. Tamién ye verdá que, güei, a la xente mozo tíra-yos más los videoxuegos.

(Adrián) Hai dos xuegos que marcaron la mio infancia y preadolescencia, y que siempre me vienen a la cabeza cuando se fala d’esti tema. Ún, de tableru, ye’l Heroquest, que me regaló mio güela siendo mui guah.ín y al que tengo echao munchísimes hores, y otru, de cartes, el Magic. Anque no último que quedé ye na sesta edición y agora cuando coses n’Internet la verdá que toi perdidísimu.

8.- Y na más por nos, cualquier cosa que queráis comentar o que creáis que seya interesante (proyeutos futuros, etc) podéis camentanosla.

Nun futuru cercanu tenemos como oxetivu que l’asociación creza y empezar con otru tipu de actividaes, escomenzar a mover el coleutivu de lo fantástico n’Asturies con tolo que se nos ocurra. Dicímoslo siempre, pero ye que ye verdá: los frikis de lo fantástico yá nun pidimos permisu, nin perdón. Somos el carneru la llueca. Y tenemos de demostralo. Vivimos nuna de les comunidaes autónomes con más talentu, una mitoloxía maraviyosa, dos llingües arriquecedores… Tenémoslo too. Solo tenemos de creyénoslo.

Despedida de la entrevista a AsturCON 2022 n’Asturianu

Y na más por güei, espero vos prestare l’entrevista a los organizaores de les AsturCON 2022. Si vos presta l’idea sofitala y dir, ya te guste’l rol o la lliteratura ye un bon plan pa pasar el sábadu, ente lletres y nun llugar perguapu.