Nel universu conocíu, la especie (o melange) ye lo más preciao qu’hai. Delles seran les faiciones que llucharán pol so control. Y como solo crez en Dune, ellí se llibrará la batalla. Fai aliances con tinu, ya que ni’l mesmu Emperador pue mantenese al marxen. Esto ye Dune : Imperium (n’asturianu) un xuegu de DireWolf y Asmodee.

Ficha:

• Xugadores: 1-4
• Duración: 60-120 min
• Edá: 14+
• Editáu por: Dire Wolf, Gale Force Nine (Asmodee)
• Autor: Paul Dennen
• Ficha na BGG

Conteníu:

• Tableru de juego
• 13 axentes de madera
• 15 fiches d’agua
• 24 fiches de Solaris
• 23 fiches d’especia
• 18 cartes de conflictu
• 40 cartes d’intriga
• 4 fiches d’alianza y 1 de xugador d’aniciu
• 60+ fichas de madera pa recursos (diferentes colores)
• 200+ cartas
• 8 líderes
• 1 Reglamentu

¿De qué va Dune Imperium?

Dune Imperium ye un xuegu basáu nes noveles de Frank Herbert, Dune. Nel planeta desérticu, conociu como Dune, ye nel únicu llugar del universu onde se pue consiguir l’especia, el recursu más preciáu del universu, y quien la controla tien munchu ganáu nel conflictu de les cases nobles del Landstraad. En Dune : Imperium vamos tomar el control d’un representante de les cases nobles que se quieren facer col control de l’especie, y faciendo aliances (bien seya coles tribus locales , los Fremen, o cola Cofradía, L’emperador o les Bene Gesserit) lluchar pol control del recursu.

Tamos ante un xuegu de construcción de mazos y colocación de trabayadores, los axentes de les cases, nel que vamos tener qu’enfrentanos ente nos y buscar aliances coles distintes faiciones. ¿Faraste col control d’Arrakis? ¿Fluirá l’especia baxo’l to control pa que la Cofradía te contenta?

¿Cómo se xuega a Dune Imperium?

Preparación

Vamos entamar polos componentes comunes del tableru :

Coloca’l tableru nel centro de la mesa al alcance de toos, llueu coloca les cuatro fiches de faición nos sos respeutivos mididores y la ficha del mentat nel so sitiu.

Tres d’esto, crea’l mazu de conflictu. Siguiendo les instrucciones del manual, nun hai perdida, y colocalu nel so espaciu nel tableru. Esto va ser un reló de la partida. Son 10 cartes.

Toca agora preparar les cartes. Baraxa’l mazu d’intrigues y ponles n’un llau del tableru. Garra’l mazu del Imperiu (menos les cartes de xugador) baraxalu y revela 5 cartes pal mercáu. Llueu pon les tres tipos de cartes de reserva formando 3 montones separaos, un de ca tipu, y ponles al llau del mercáu.

Tocanos preparar los componentes de xugador, ca xugador va repetir el procesu :

• Ca xugador escueye un de los líderes o faese por sorteo.
• Ca xugador escueye un color y coxe tolos cubitos y marcadores d’esi color y ponlos xunto al líder
• Tolos xugadores entamen el xueu con les mesmes 10 cartes básiques.-
• Tolos xugadores ponen dos de los axentes enriba de la ficha del lider y l’otru al llau del tableru.
• Coloca un de los marcadores redondos nel track de puntuación y l’otru na reserva.
• Colocar un cubito en ca track d’aliances.
• Ca xugador escueye una guarnición y coloca tres cubitos. Amás pone el indicador de combate nel 0.

Con esto ya podemos entamar a xugar. Sorteamos el xugador d’aniciu, damos-y la ficha correspondiente y a xugar!

Como se xuega a Dune Imperium

Dune Imperium va desendolcase en 5 fases, anque’l meollu de to ta na segunda y tercera, vamos desplicales toes per enriba.

Fase 1: Aniciu de la ronda.

Esta fase ye mui cenciella. Destapamos la primera carta de conflictu y ca xugador roba les 5 primeres cartes del so mazu.

Fase 2 : Turnos de xugador.

Esta fase va subdividise en dos fase.La primera, la fase d’axente, entamando pol xugador d’aniciu van xugase cartes de la mano. En función de la carta que xuguemos, colocaremos un axente nun de los iconos d’axente que traiga. Solo 1 axente. Amás como regla aicional, nun se pue poner un axente onde ya hai un. Tamién tenemos que cumplir tolos requisitos de la zona onde lu coloquemos, pagar especie, solaris, tener daqué d’influencia… Aplicará los beneficios del llugar on de pusiste l’axente. Amás tamién o pues aplicar los efectos del recuadru d’axente de la carta (recuadru gris). L’orde qu’aplicar les aiciones decidelu’l xugador. Si una carta nun tien iconos d’axente, nun la pues xugar nesta fase.

Como apuntes aicionales, cuando na casilla tien iconos de conflictu, podemos unviar 2 tropes de la guarnición, más les que nos dé al conflictu. Hai daqué regluca más, pero más o menos esto ye lo principal.

Cuando un xugador nun tien más axentes, o decidi nun usalos, pasa (solo él) a la fase de revelación. Equí mostrara toles cartes de la mano y executará la parte de la carta d’abaxo. Sumara la persuasion total y podrá mercar cartes nel mercáu. Calculará, tamién, el valor de conflicto. Pa eso contará les tropes que tien en conflictu, ca una valdrá dos puntos. Tamién sumará los iconos de les cartes con espada. Col total pondrá’l so marcador nel valor correspondiente del track de conflictu.

Fase de combate

Cuando tolos xugadores terminen la so fase de revelación, entama la fase de combate. Por orde de turnu, los xugadores puen dir mostrando cartes d’intriga (les de combate) hasta que tos pasen. Momentu que se resuelve’l combate. El que más puntos tea, gana (obvio). Y llevase la recompensa de la carta de conflictu en xuegu. El segundu, la segunda y asina. En casu d’empate los xugadores llevaríen la recompensa d’una posición inferior, si pudieran.

Fase d’Hacedores

Nes casilles onde haya un icono d’Hacedor y nun tengan axentes, podremos un recursu d’especia acumulandose colos que ya hubiere.

Fase de retorno

Nesta cabera fase compruebase si daquién llego a los 10 puntos de victoria, o si nun hai más cartes de conflictu, si non… Recueyense tolos axentes, descartense les tropes (a la ficha de líder nun a la guarnición) les cartes usaes van pal descarte y pasase la ficha d’aniciu al xugador de la izquierda

Quien gana

Pa ver quien gana ye mui cenciello. Si na fase de retornu daquién ta en 10 puntos de victoria o más o nun hai cartes de conflictu, desendolcase’l desenlace. Muestrense toles cares d’intriga de desenlace de ca xugador. Una vegá resueltes el que tenga más puntos de victoria gana la partida.

Opinión final

Vamos cola opinión final d’esti Dune Imperium. Ya vos fale d’él nes primeres impresiones, agora vamos ver si caltengo les sensaciones. Como vos comenté, esti xuegu tenía ganes de xugalu dende bastante enantes de mercalu. Taba lleendo’l llibru, la película taba estrená, y la verdá ye que tolo qu’había visto d’él paecíame bastante prestoso, asina que llanzeme por él. Vamos ver si mereció la pena.

Lo físico

Vamos entamar como siempre coles coses físiques, lo que se ve a simple vista. Teo que dicir que me resulta prestosu de ver cuando lu tengo na mesa, les semeyes son basaes na película que sacó l’añu pasáu (?) Giles Villeneve. Son semeyes guapes nes cartes, que t’intenten meter na partía. Amás, pese a nun tener munchos allardes, el diseño gráficu veolu mui correutu, con tolos símbolos viendose bono y colocaos pa que se vean. Esto suele venir mui bono, pero n’esti xuegu con tantos iconos agradezse munchu.

En xeneral la producción ye bona, el tableru ta guapu, los materiales y recursos tan prestosos, nun hai quexa n’esi aspeutu. Quiciabes les cartes son un poco endebles y les enfundé. Pero al ser un xuegu de construcción de mazos diba facelo igual al tener que sufrir bastante traxín d’embaraxar.

El xuegu

A mi entrame un xuegu polos güeyos, pero si llueu nun se soporta en na… Lo mesmo da lo guapu que se seya. Quisi ponevos un poco per enriba les regles de xuegu, al escribiles quedaronme un poco llargues y nun sabia si poneles o non. Nun vos asustar, el xuegu son 4 regles y conocer un poco la iconografía, pero eso cola fueya d’ayuda que trai’l xuegu nun vais tener problema. Al segundu turnu ya lo tenéis pillao.

Como dixi na presentación, el xuegu ye una construcción de mazos amestao n’una colocación de trabayadores. Al menos nel mio casu ye la primera vegada que m’atopo un xuegu con esta amiesta. Tampoco vos sabría dicir que ye lo que más pesu tien na partida, porque una en sin l’otra nun les veo. La colocación valte pa ganar recursos, tropes, etc. Los recursos ye algo perimportante diría, yo al menos paez que siempre voi xustu de recursos. Pero en sin la construcción de mazos nun pues colocar esos axentes, o ganar la influencia coles faiciones mercando cartes col so iconu… Creo que les dos mecániques faen un tandem perguapu.

El tema

La temática de los llibros ta mui presente nel xuegu. Les aliances, el Landstraad, l’Emperador, los conflictos pola especia… Cuando lu prebe la primera vegada (y el restu) ya había entamao’l llibru y veía reflexao tos esos conflictos politicos y militares nel tableru, coles cartes. Toda esa interacción que nun se ve demasiao n’un eurogame. Porque sí, ye un eurogame al fin ya l cabu. Mui temáticu, sí, pero un eurogame. Interacción que brilla totalmente cuando lu xugamos a 4 xugadores. Esa llucha por ocupar colos axentes los meyores sitios. Esa cosa del xugador d’aniciu xugar con un poco ventaxa por poder escoyer primero y ver lo que faen los demás nos conflictos, pero tamién la incertidumbre de ver cuantes tropes consiguen reunir el restu de xugadores… Paeciome mui entreteníu de xugar. Toes estes coses ayuden, y munchu, a metete nel tema.

Al rodiu de los d’enriba, caltengo les sensaciones de ser un xuegu mui tácticu. Tomando decisiones ca poco. Voi al conflictu? Merezme la pena agora? Espero o entro porque la recompensa ye mui suculenta… ¿Sedríen les sensaciones que los Atreides y los Harkonnen tendríen? Equí tamién se pue ver pincelaes de la mecánica de mayoríes. Solo nel conflictu, pero que pue decidir les partides si nun termines de ganar nengún, o nun termines por posicionate bono n’ellos.

Ya, pa dir finando dicir, que si vien l’automa que nos trai (ties una aplicación tamién) ye mui bono y entreteníu, y anque escale perfeutamente a tolos xugadores… Onde más brilla ye xugando a 4, onde se ven tos esos conflictos e interacciones, y tas maldiciendo al collaciu d’al llau de porque se puso ehí. L’incertidumbre de les cartes d’intriga que tendrá. El vete apretáu polos recursos…Nun se. Tan entrando ganes de xugalu haha.

Resumen final

Vamos col resumen final de Dune Imperium. Un xuegu de construcción de mazos y colocacion de trabayadores, anque con algo de mayories na zona del conflictu. Nun xugué a nengún xuegu cola temática de Dune, creo que los hai mui bonos. Pero yo diría que, al menos, prebarais esti si vos gusta tola temática de los llibros. Creo que vos fara tresportar hasta ellí y lu disfrutaréis munchu. Un xuegu qu’escala bono a cualquier númberu de xugadores, va resultavos prestosa la partida, onde lo vais pasar como enanos ye en partíes de 4 xugadores. Nel xuegu vais lluchar pol terreno, direuta e indireutamente, debío a esa interacción.

Respeuto al tiempu, yo creo que tien una duración perfeuta, ni mui llargu ni mui curtio. N’hora y media tenéis la partida finá. Porque les regles son cencielles, puen paecer llioses pero al segundu turnu tas funcionando como un reló. Y nun t’asuste la iconografía, si que ye varia pero bastante descriptiva. Y sino una güeyá a la fueya de referencia y llisto. Tamién lu veo un bon siguiente pasu si quies afondar na mecánica de construcción de mazos Un bon resumén pa mi sedría que foi una de les sorpreses d’esti 2022 y que me plantego mercar n’un futuru la primera espansión.

Dune Imperium va prestate si…

• Prestate la temática Dune
• Quies un eurogame temáticu.
• Un xuegu qu’escale bono, anque’l meyor númberu seya a 4
• Quies muncha interacción
• Quies un pasu más na mecñanica de construcción de mazos.

Dune Imperium nun te va prestar si…

• Nun te gusta la interacción
• Nun te gusta Dune.
• Construcción de mazos o colocación de trabayadores nun son pa ti.
• Pa mi nun ye un contra, pero si nun te gusten los xuegos de más de 1h igual esti se te fae bola, pero a mi nun se me fae pa na llargu.

Y finamos cola entrá de güei. ¿Xugasteis a Dune Imperium? ¿Qué vos paeció? Recomendaisme daqué xuegos cola mesma temática. Lleovos nos comentarios!