De sobra ye sabio que l’universu de la Tierra Media ye’l mio preferíu. Y fuera de los xuegos d’escaramuces o batalles con miniatures, nun había (o nun lo conozo) un xuegu estilu dungeon crawler d’esta temática. Ye por eso que cuando salio fai unos años nun tuvi duldes y merquelu. Vamos cola opinión d’El Señor de los Anillos Viajes por la Tierra Media, n’asturianu, de Fantasy Flight Games

Ficha:

• Xugadores: 1-5
• Duración: 60min
• Edá: 14+
• Editáu por: Fantasy Flight Games
• Autor: Grace Holdinghaus, Nathan I. Hajek
• Ficha na BGG

Conteníu:

• Guía de referencia
• Cuadernu d’aprendi a xugar
• 22 pieces de tableru
• 28 cartes de dañu
• 6 fueyes d’héroe
• 83 cartes d’oxetu
• 15 cartes de ventaxa
• 21 cartes de títulu
• 30 cartes d’habilidá básica
• 30 cartes d’habilidá d’héroe
• 72 cartes de cometíu
• 20 cartes de debilidá
• 10 cartes de terrenu
• 31 figures de plasticu
• 30 fiches de terrenu
• 12 estandartes enemigos
• 12 peanes de plásticu
• 84 fiches d’efeutos

¿De qué va El Señor de los Anillos Viajes por la Tierra Media?

La Tierra Media ye un llugar llenu de peligros, nun sabes cuando la Solombra t’acecha oscureciendo to lo que toca. Temores antiguos que vuelven a surdir. Tu y los tos compañeros d’aventures, viaxareíes pola Tierra Media pa intentar evitalo, pero nun va ser cenciello. Enemigos, les dificultaes del camin y sobre to… El tiempu van xuga na vuestra contra.

El Señor delos Anillos Viajes por la Tierra Media ye un xuegu collaborativu, que s’apoya nuna app, del tipu ¿Dungeon Crawler? nel que los xugadores tomaran el papel de los héroes del legendarium de Tolkien (dalgún inventáu) e intentaran que les amenazas que van surdiendo nun se materializen nos distintos escenarios de la campaña. Un xuegu d’esploración y viaxe nel que tamién vamos tener que sacar l’espada pa defendenos de los peligros. ¿Sedrás quien a salvar la Tierra Media o que la Solombra s’estienda ye daqué inevitable?

¿Cómo se xuega a El Señor de los Anillos Viajes por la Tierra Media?

Preparación

La preparación del xuegu ye bastante cenciella, y va dir toa guía pola aplicación (disponible pa iOS, Android y Steam). Seleccionamos la campaña que vamos xugar, los personaxes que vamos escoyer, asina como la so profesión.

Una vez escoyíos los personaxes, tenemos que facer el so mazu de xuegu. Pa esto coxemos les 6 cartes d’habilidá básica, les 5 cartes del héroe y les 3 primeres cartes del cometío (profesión) y embaraxámosles. Solo nos queda seleccionar los oxetos (que nos vamos apoyar na aplicación) y coyer les cartes correspondientes

Ya pa finar, ponemos a mano tolos tokens y mazos (por exemplu los de dañu y mieu). Tres d’esto, va ser l’app la que nos guie nos siguientes pasos, colocando les pieces del mapa según les vayamos descubriendo y onde tienen qu’ir.

Como se xuega a El Señor de los Anillos de la Tierra Media

Vamos ver como se xuega a esti El Señor de los Anillos Viajes por la Tierra Media. Va desendolcase en 3 fases: Fase d’aiciones de los xugadores, Fase de Solombra y Fase de Reagrupamientu. Vamos veles per enriba.

Fase d’Aiciones

Nesta fase los xugadores, por turnos y nel orde que queramos, van poder facer dos aiciones de entre mover, atacar, interactuar pudiendo repetir dalguna si queremos

• Mover: En ca aición de mover, moveremos dos casilles nel mapa. Hai que tener curiau, si nos movemos desde una casilla onde hay enemigos provocamoslos (ataquen). Si podemos, por exemplu, facer mover 1,interactuar, y mover la que nos quede.
• Atacar: Bien sella a distancia o en combate cuerpo a cuerpo facemos una prueba d’habilidá (agora les vemos) Según los exitos y l’arma facemos dañu a los enemigos (apuntamoslo na app). Curiau que nos puen devolver el ataque.
• Interactuar: Facer daqué nel mapa. Investigar fiches d’amenaza, de personaxe… Esto solo sedrá una aición si cuando lo marquemos na app tien una flechina. Si no nun cuntara como aición.

Fase de Solombra

Esta fase ye completamente guiá pola aplicación. Ye basicamente la fase de los enemigos, que nos fadrán dañu normalmente. Tamién ye onde s’actualiza el marcador d’amenaza, que ye un reló de la partida. Según l’escenariu sedrá más o menos, si llegamos al final perdemos. Tamién tenemos hitos dientro d’esi reló, onde cuando los pasemos (que pasará) dirán pasando coses, normalmente males.

Toa esta fase ta mui bono dirixía pola app. Vamos siguiendo lo que nos diga.

Fase de reagrupamientu

Esta ye la cabera fase, onde volveremos a facer el mazu y llueu podremos otear. Esto ye robar dos cartes, preparar una (ponela en xuegu nel tu personaxe) y l’otra ponela enriba o debaxo del mazu. Esto valnos pa preparanos un poco’l mazu y tener daqué habilidaes disponibles.

Prueba d’habilidá

Falamos antes de les pruebes d’habilidá. Esto va ser lo que sedría la tirada de dados nos dungeon crawler más clásicos. Pero nel nuesu casu sedrán cartes. Cuando tengamos que facer una prueba d’esti tipu vendrá asociá a un atributu del personaxe. Esti atributu diranos les cartes que vamos robar. Ca carta con un circulu naranxa, ye un ésitu. Si llegamos a los establecio, superamosla, si non pues… Asumir les consecuencies. Tenemos tamién l’opción de tresformar simbolos de fueya verde n’esitos con fiches d’inspiración (que vamos consiguiendo durante la partía)

Como ganar

Pa ganar l’escenariu ties que completar toles misiones principales que te van saliendo. Si lo consigues, ganasti l’escenariu. Si muerren tolos personaxes o acabase’l tiempu (marcador d’amenaza) perdes l’escenariu pero la campaña nun fina. Xugarás el siguiente que te marque en función de los que pasare.

Espero que vos ficierais una idea de como se xuega más menos, ya sabéis que nun ye l’oxetivu facer un tutorial mui detalláu, solo unes pincelaes 😛 Vamos cola opinión de El Señor de los Anillos Viajes por la Tierra Media

Opinión Personal

Como siempre nun vos ablucará ver xuegos cola temática d’El Señor de los Anillos per equí. Ya vos fale d’El Señor de los Anillos LCG, de la Búsqueda del Anillo tamién un poco… Pero faltaba un xuegu con miniatures y esploración na llista, asina que na más ver esti ya lu pusi na llista de deseos. Un dungeon crawler de El Señor de los Anillos tenía qu’esistir, anque pa mi nun lo seya del to.

Edición física

Vamos entamar polo evidente, el xuegu nun ye baratu. Ya va feches dixi qu’enantes l’escepción yeren los xuegos de 100€ agora ya se convirtió en normal. Esti ta’l rodiu de los 100 €. ¿La calidá de los materiales ye bona? Sí. Trai miniatures con bastante detalle, munches cartes, troquel gruesu, tamién hai qu’entender que’l desarrollu de l’app val perres… La verdá ye que la edición nun tengo muncha pega pol preciu. Son 10 o 12 escenarios a una hora larga ca un, creo que sale bastante guapu si lu xuegues completu, contando qu’al ser cambiante, pue haber diferentes escenarios entre una vegada y otra.

Lo que si tengo que dicir ye que pa un xuegu de 100€ podíen facer semeyes esclusives del xuegu y non reciclar d’otros xuegos. La gran mayoría de semeyes vienen d’El Señor de los Anillos LCG. Sin dir más lloñe, les semeyes de los héroes son les mesmes. Creo qu’hubiere tao bono.

El xuegu

Voi a entamar pol final, el xuegu paezme bonu. Prestame xugalu abondu. Ye más, animeme a escribir esto porque estos días entamamos de nuevo la campaña, pa llueu enllazar coles espansiones. Podéis vilipendiame si, colos xugos por probar torno a esti, pero la cabra tira’l monte:P . Solo lu xugúe a dos persones, con un héroe ca un, y en solitario. Y creo que funciona per bien. Diría incluío qu’a más de tres xugadores pudiera facese un pocu llargu ente les tos aiciones y que te vuelva a tocar, pero ye un paecer.

Otra cosa evidente, y que pa daquién ye una pega, ye’l tema de l’app. Sí, ye un xuegu que se guia por una aplicación. Y dalgún diz que quita inmersividá al xuegu. No ye’l mio casu. Creo que, con dalgún defeutu, ayudame a meteme na aplicación, colos testos, l’hestoria… Nun se, a mi nun me molesta pa na y fai que los xugadores puan xugar tos nel mesmu bandu quitando la cosa d’escoyer un xugador del mal. Tampoco vos quiero vender la moto, hai delles coses que chirrien un poco, pero hasta fai pocu al menos andaben con actualizaciones.

Ya no que ye les mecániques, al paecer ye mui paecía a Mansiones de la Locura, y pue ser que tengan razón. No obstante equí l’ésitu va dicilo les cartes y el to mazu. To’l tema de preparar cartes e intentar mercar les habilidaes correutes pa perfeccionar el personaxe, cambiar de cometío etc, da-y una profundidá mui interesante y, correxime si m’equivoco, el Mansiones nun tien (solo xugué una vegada). Creo que los diferentes cometíos tan desendolcaos mui bono, con sos virtúes y defeutos pa facer el xuegu más collaborativu.

Creo que ye un aciertu’l como se meyora l’equipo. Nun esiste mercáu como tal onde merques armes, armadures, etc. Vas meyorando les armes según fluya la campaña colos puntos de erudición. Estos ganeslos faciendo misiones secundaries, hitos de la campaña escenariu, etc. Creo que va col tema, nos llibros nun ves a nengún personaxe mercar na, to ye o dao o atopáo. Esto vien a simular esto mesmo.

Mentar tamién que creo que la fase de Solombra ta bien fecha, el tema del marcador d’amenza creo que ye un aciertu. Va bono col tema y amás fai que nun se te vayan les partíes muy llargues. Date esa angustia que ves nos personaxes de los llibros, esa carrera por llegar a la meta (vencer) antes de que fine’l tiempu… Tamién tien esi aspeutu de dificultá nel que nun momento pue torcese la partía. Nun momento llenase de enemigos que te persiguen, eso fai que el marcador d’amenza medré más rápido y que, caro ta, seya más difil de vencelos. Hasta l’orcu más cochambrosu pue facete un traxe de maera si vienen mal daes…

El tema

Pero caro, un xuegu d’El Señor de los Anillos si nun acompaña’l tema nun ye lo mesmo. Pos bono, tampoco defrauda nesi aspeutu. Los temas de los viaxes, la esploración del mapa, tan presentes nos llibros. El tema de la carrera escontra la Solombra, lo bono que tan los personaxes respeutu a los llibros (lo que nun tan inventaos) Pa mi ye una nueva forma de caminar pela Tierra Media, pero d’una manera distinta. Si me preguntáis quedariame con El Señor de los Anillos LCG pero tamién taría dispuestu a xugar siempre a esti. Ye más a la mio parexa gusta-y munchu más esti. Tol tema de les miniatures, palpalo… Da-y un daqué, que lu invita a xugar. To esto sumao a que ye en si, pa mi caro, un gran xuegu failo una bona compra.

Resumen final

Vamos col resumen final d’esti El Señor de los Anillos Viajes por la Tierra Media, un xuegu del tipo dungeon crawler, anque munchu más centráu na esploración del mapa que nel bicheo pa facer medrar el personaxe. Tamién hai que soltar espadazos nun vos abluquéis. Creo que’l sistema de les cartes ta mui bono implementáu, eliminando quiciabes un poco l’azar de los dados y sustituyendolo por como vas meyorando’l mazu col pasu les aventures, coles habilidaes de cometíu d’un o varios tipos. Pero con esi pocoñin d’azar que da-y esa incertidumbre de llevantar una carta y ver que sal.

Tamos falando d’un xuegu con aplicación, y esti puntu pue ser diferencial en munchos xugadores a l’hora de xugalu o mercalu. Pa mi no te saca de la esperiencia, pero necesitesla pa xugar. Va ser la que te guie na partia y quien controle a los enemigos y l’aventura. En xeneral funciona bona, pero si que tien dalgún defeutu. A mi nun me toco, pero tengo entendío que daquién salto-y un bug que “ensució” un poco la campaña. No obstante taben actualizandola hasta nun fai munchu.

Creo que’l tema ta implementáu bono, metiendote nos mundos de la Tierra Media y faciendote participe de la hestoria recorriendo llugares conociós pa tol que t’avezáu nos llibros. No obstante nun creo que faiga falta conocer los llibros pa na. Ye esfrutable completamente, agora si, mola más… Pa que nos vamos engañar. Ye un xuegu que pue paecer caru, 100€ más o menos. Pero no polos componentes y les miniatures, que creo que tan mui bono, sino pol fechu del reciclao de semeyes d’otros xuegos de la casa. Tolos xuegos de Fantasy Flight adolecen, pa mi, d’esto. Y creo que ya que vas dexar unes bones perres que menos que la mayoría seyan semeyes nueves. Igual ye cosa mia tamién. Agora, hores de xuegu-preciu nun hai quexa.

Pa finar ye un xuegu zarráu, nun s’esperen más espansiones. Pero actualmente les 2 grandes qu’hai pues consiguiles. Eso si… a 70€ :S Tamién tienes campañes dixitales que tan al rodiu de los 7-8€. Dos en total. Ya vos diré falando de to esto, qu’al menos lo físico tengolo to.

El Señor de los Anillos Viajes por la Tierra Media va prestate si…

• Prestate la temática de El Señor de los Anillos
• Quies un dungeon crawler centráu na esploración.
• Un xuegu de campaña
• Un xuegu con miniatures
• Nun te presten muncho los dados nestos xuegos, pero si les cartes.
• Molente los xuegos con aplicación

El Señor de los Anillos Viajes por la Tierra Media nun te va prestar si…

• Nun te gusten los xuegos con app
• Nun te gusta El Señor de los Anillos.
• No te gusta que tenga daqué azar. Prepares les cartes pero.. .tienen que salir
• No quies, o no ties tiempu pa un xuegu de campaña.
• No busques un xuegu de más de 100€

Y na más por güei. ¿Xugasti a El Señor de los Anillos Viajes por la Tierra Media? ¿Qué te paeció? ¿Cuál ye’l to xuegu preferíu de la temática? ¡Dexámelo en comentarios!