Hai xuegos que trunfen tanto que se faen reediciones del mesmu xuegu cambiando daqué. Un exemplu foi Azul, y otru ye patchwork (asturianu) del que falamos güei . Vamos ver que tal ta.

Ficha:

• Xugadores: 2
• Duración: 15-30
• Edá: 8+
• Editáu por: Lookout Games (Asmodee)
• Autor: Uwe Rosemberg
• Ficha na BGG

Conteníu:

• 1 tableru central
• 2 tableros-colcha
• 1 peón
• 33 parches
• 5 parches de cuero
• 1 lloseta de bonus 7×7
• 50 fiches de botón
• 1 reglamentu

¿De qué va Patchwork?

La técnica de costura conocía como Patchwork nun ye cenciella. Requier tiempu, esfuerzu y l’inxeniu d’axuntar tolos retales y facer una colcha guapa. Esi va ser la nuesa llabor en Patchwork

Tamos ante un xuegu de puzzle y colocación de llosetes, nel qu’alternativamente vamos dir escoyendo un retal y llevalu a la nuesa colcha intentando que nun nos queden furacos llibres y perdamos puntos.

¿Cómo se xuega a Patchwork?

Preparación

Vamos cola preparación, que vais ver que ye ente na y menos.

Ca xugador cueye un tableru de colcha, el so marcador de puntos y 5 botones.

Tres d’esto, ponemos nel centro’l tableru central y colocamos los nuesos marcadores na casiella de salida.

Al rodiu d’esti tableru, ponemos tolos parches nun círculo. Atopamos el parche que midi 1×2 y colocamos el peon xusto delantre, dexando esa pieza la cabera.

Ponemos los parches de cuero nel tableru principal, onde tan dibuxaos y… A xugar!

Como se xuega a Patchwork

El xuegu ya veis que dura 12-30 minutos, deprender a xugalu nun lleva munchu ya lo veréis.

Ca xugador nel su turnu pue escoyer ente dos aiciones. Avanzar o mercar un parche. Nes dos aiciones, siempre s’avanza el marcador de tiempu

Avanzar y recibir botones

Nesta aición avances el to marcador de tiempu hasta ponete xusto delante del otro xugador. Ties qu’avanzar esí númberu de casielles exactu. Coyes tantos botones como casilles avanzaste.

Mercar y poner parche

Nesta aición pues escoyer cualquier parche de los tres de delantre del peon. Tres d’esto, pones el peon al sitiu del parche y tendrás que pagar el preciu en botones que t’indique el parche escoyíu. Llueu colloca’l parche na colcha, pues xiralu y voltealu, pero nun pues ponelu enriba d’otru parche.

Pa finar, avanza’l marcador de tiempu lo que diga’l parche.

Hai daqué asuntos que tenemos que reseñar:

• El primeru que pase por un parche de cuero coyelu. Estos parches sirven pa rellenar furacos na colcha
• Cuando pases por una casiella de botón, recibes tantos botones como botones tenga na tu colcha.
• El primer xugador que faiga una zona sin furacos de 7×7, llevase la ficha. Solo vale pa la puntuación final.

Quien gana

Cuando los dos xugadores lleven el marcador de tiempu al final, fina la partida. Pa ver quien gana, sumamos los botones que tengamos de sobra, más la ficha de 7×7 si la tuviéremos. Llueu restamos 2 puntos por ca furacu na colcha. El que más puntos tenga… Gana!

Opinión final

Vamos cola opinión final de Patchwork otra obra d’ésitu del prolificu Uwe Rosenberg, creador de, ente otros, Agricola. A naide paecera-y raro que diga que Patchwork ye un ésitu comercial. Milenta ediciones, en toles grandes superficies, lu pues atopar e incluío ya salieron varies ediciones con diferente temática. Vamos ver si l’ésitu ye merecíu baxo’l mio puntu de vista.

Edición física

Tamos ante un xuegu de caxuca y preciu conteníu (creo que ta 20 € más o menos). Los materiales, tan bonos. Troqueles y peones de maera. Son de buena calidá y les semeyes son colches. Pal preciu del xuegu tan estupendos nun se pue pedir más

El xuegu

Vamos colo que ye’l xuegu en sí. El xuegu ye un puzzle nel que tienes qu’intentar dexar los menores furacos posibles d’un tableru. Que da la casualidá que ye una colcha pero podía ser cualquier cosa. A to esto hai que sumar la xestión de los botones, qu’a la postre ye lo que fai ganar la partía.

Encontrar esi equilibriu ye la clave, si vas por munchos botones adelantando casilles del marcador de tiempu: munchos furacos llibres y penaliza. Si merques munches pieces y mui grandes, quiciabes rellenes la colcha pero… ¿Cuantos botones te queden? Tienes l’opción de ser previsor tamién, pero hasta ciertu puntu, porque pues facete una idea de que parches te puen quedar pero sin tenelo fixu. Dependes del otru xugador pa poder ver que pieces vas poder coyer.

Nesto cabero ta’l intringulis del xuegu, la mayor decisión ye qu’aicion tomar. Paez una tonteria pero ye asina. Mantener l’equilibriu qu’enriba dixi podrá facer que merques los parches que más te valgan y tener botones suficientes p’afrontar el final de partía.

La verdá ye que Patchwork nun ye’l mio xuegu preferíu. Nun s’acerca tampoco. Tos estos xuegos de puzzle nun ye que no me gusten pero prefiero otru tipo de xuegos. Tamién se me dan mal haha. No obstante, pol preciu que tien si lo vas xugar dacuando pue ser una bona opción. Perfeuto pa xugar cola parexa, o con quien quieras, nun ratucu muertu. Ya veis, 15-30 minutos tenéis el xuegu ventiláu y cola sensación de competir la victoría en toles partíes. No hebo nenguna que dixéramos qu’un xugador s’escapare en puntos.

El tema

Ya lo dixi enantes, el tema ye facer una colcha de Patchwork. Podía ser cualquier otru, dafechu hailu d’Halloween y San Valentín. Nun los prebe pero imaxino que sedrán mui paecios. Yo creo qu’esti aspeutu ye’l por qué esti tipu de xuegos nun me terminen d’atraer. Yo cuando xuego quiero ver que faigo daqué. Tomar una sablera de Normandia, echar un gabitu a una neña nos sus sueños, salvar la Tierra Media… No sé, facer una colcha nun me llama l’atención que queréis que vos diga 😛

Resumen final

Vamos col resumen final de Patchwork, un xuego del aclamau Uwe Rosenberg nel que vamos tener que facer una colcha de Patchwork, la meyor de toes. Un xuegu esclusivu pa dos xugadores nel que vamos facer un puzzle mentas xestionamos la moneda del xuegu, que son los botones. Estos valdrános pa mercar nueves pieces y pa llueu, nel recuentu final, tener la posibilidá de ganar la partía.

Ye un xuegu que ye rápidu de xugar y cenciellu de deprender. Si vien pa mi nun ye una de les meyores opciones, al menos una vegá al añu acaba saliendo a la mesa po lo que vos comento. El fechu de que nun tenga tema, pa mi ye un contrapuntu importante, pero entiendo que’l xuegu trunfe na so medida. Nun por na’l grupo Asmodee, decidió finalmente sacalu cuando la llicencia de Maldito Games finó (esta ye la versión que yo tengo). Si nun vos gusta facer colches, tenéis l’opción de prebar la versión d’Halloween o San Valentin. Imaxino que sedrán asemeyaos pero nun tuvi l’oportunidá de prebalos, e imaxino que de ser por mi nun lo faiga. Teniendo esti tengo bastante.

Patchwork va prestate si…

• Prestente los xuegos de puzzle
• Quies un xuegu pa dos xugadores
• El tema nun ye importante pa ti.
• Busques un xuegu rápidu y cenciellu, pero con decisiones.

Patchwork nun te va prestar si…

• Nun te gustenlos xuegos de puzzle.
• Quies algo con tema
• Si nun vas a xugar a dos xugadores.

Y na más por guei. ¿Conociais Patchwork? ¿Xugastéis a alguna de les sos versiones? ¿Prestovos? Camentaimelo nos comentarios!