Güei lo más normal ye que casi cualquier cosa la pueas facer col movil. Asina que yera d’estrañar que nun s’implementase un xuegu con esa temática. Pos como son coses del mio gremiu, más o menos, apeteciame prebalu y tenelu. Y equí vos dexo les primeres impresiones de Smartphone Inc de Maldito Games (asturianu)

¿De qué va Smartphone Inc?

Tamos na era de les comunicaciones, y les teunoloxíes desendolacaes pa los móviles tan ca poco cambiando y xurdiendo nueves técniques y avances. Investigar eses teunoloxíes y posicionase nos mercaos antoxase vital si nun quies que la to marca se queda p’atras. O lo que ye lo mesmo nestos lares, desapaecer.

Smartphone Inc ye un xuegu de tipo económicu nel que sedremos los CEO d’una compañía de móviles. Decidiremos que teunoloxíes investigar y en que mercaos posicionase p’al finar de les cinco rondes ser la meyor compañía qu’esiste. Vamos coles primeres impresiones de Smartphone Inc.

Primeres impresiones de Smartphone Inc

Smartphone Inc ye un de los xuegos que me trayeron esti añu los Reis maxos. Tenía muncha gana prebalu, pero nun había manera (l’otru tamién conste). Asina que si Mahoma nun va a la montaña… Xuguelu en solitariu cola IA que trai’l propiu xuegu. Voi intentar falar de les sensaciones que me dio’l xuegu y sin ser una opinión cerrá. Solo xugando al solitariu sedría difícil. Vamos con eses primeres impresiones de Smartphone Inc.

Al turrón

Como vos camenté na introducción Smartphone Inc ye un xuegu de tipo económicu que si vien nun esiste’l dineru como tal, como vendas los dispositivos móviles y al preciu que lu vendas van decidir quien gana. To esto asina contao nun paez na novedoso, de xuru que munchos xuegos faen daqué paecío. Pero nesti casu, una de les coses más novedoses ye que lo que puedas facer ca fase va dir supeditao a lo qu’hagas na primera y de como coloques los dos tableros de xugador. Estos tableros, los mesmos pa ca xugador, puedes da-yos les vueltes que quieras y superponelos pa dexar los símbolos que quieras a la vista. Estos símbolos sedrán los que te permitan durante la ronda investigar, vender, establecer el preciu de los tos productos, espandise…

Si bien ye verdá que llueu pues modificar lo que muestres del tableru con fiches d’industria, facer una bona selección ye perimportante. Esta selección va facese tos a la mesma vegada y en secreto. ¿Por qué en secreto? Puesto que l’orde de turnu nes fases va marcalu’l que venda los productos a más baxu preciu. Y caro, vender más tarde venderás más caro, pero igual nun queden mercaos abiertos… Tengo que dicir qu’esti xuegu creo que va a ganar a más xugadores. Al menos col mapa del xuegu base ye difícil que nos peleemos polos mercaos polo que se perde interacción ente los xugadores (creo que na espansión solucionase) a poco númberu. Pero a más xugadores, creo qu’esa llucha por posicionase pue tar perguapa. Tamién tien un mecanismu de mayoristes pa escalar el xuegu (sitios onde te pues posicionar pero nun pues vender direutamente) qu’a 4 o 5 xugadores desapaecería.

Aspeutu visual

A tolo d’enriba hai que suma-y que tien una producción perbona. Si bono nun tien grandes semeyes to nel mapa ta perclaro y con una calidá de los componentes mui bona con caxes pa ca xugador, fiches de metracrilato… Da gusto velu puestu na mesa. Eso sí, al menos el del base, vas necesitar una bona mesa pa xugalu ya que ye bastante grande. Pero ya vos digo que compensa. A preciu normal me paez que tien una relación calidá-preciu estupenda tocante a los materiales y producción, pero si lu consiguís n’ufierta (creo que se taba saldando) paez un xuegu mui apetecible.

Resumen final

Vamos col resumen final d’estes primeres impresiones de Smartphone Inc. Un xuegu de corte económicu nel que realmente nun vamos tener perres que gastar sino que lo que vamos facer ye posicionamos nos mercáos y vender móviles en función del preciu qu’estipulemos. La gran novedá vien de los tableros de xugador que na primera ronda vamos intentar colocar pa que muestren los iconos que más nos interesen. Esto ye perimportante porque d’ehí saldrá lo que podemos facer y nun facer na ronda. Lo que son les regles del xuegu son cencielles, pero casalo to pa que s’integre na rueda y pues prosperar ye importante. Sobre to la regla de quien va primeru nes rondes, regla de prioridá, que lo va marcar el preciu de venta de los productos. Veolo un sistema perguapu y que ties que tener en cuenta siempre a l’hora d’establecer que vas facer esti turnu.

Creo qu’el xuegu va a ganar a más xugadores, nel tableru del xuegu base pa partíes de dos xugadores y diría que 3 tamién, nun paez haber muncha interación. Sicasi a más creo que ye onde más brille, más interacción y más tensión. La espansión creo que lo arregla, pero ya diremos per ehí. La partía nun tien pinta d’alargase munchu, quiciabes les primeres rondes pa ver como funciona pero una vegá cueyes velocidá cruceru va mui rápidu. No obstante, y con esi handicap en mente, la partía sirviome pa deprender a xugar pero tamién me resultó entretenía.

A to esto tenemos que sumar una producción mui bona. Con materiales de calidá y to mostra nel tableru de forma de que lo veas áxil. Nun vais a dicir de primeres, vaya xuegu más guapu, pero llueu puestu na mesa, a mi personalmente, paezme preciosu.

Y na más…

Y na más por güei. ¿Prestenvos los xuegos económicos? ¿Pebasteis esti Smartphone Inc? ¿Qu’opinión tenéis? Dexaimelo en comentarios que me presta lleelo. Por mi parte, veremos si consigo xugar más parties y a más xugadores y podemos ver si caltengo les impresiones nel Falando De Gracies por lleer!