Los Funkos ya nun son solo pa coleicionar, agora tamién pues xugar con ellos, más o menos :P. Güei traigovos les primeres impresiones de Funkoverse, na so versión de Harry Potter, de Fungo Games y Prospero Hall (asturianu)
De qué va Funkoverse?
Funkoverse ye un xuegu d’enfrentamientu nel que normalmente dos xugadores lluchen pola victoria. Nun vos falo d’un tema n’específicu porque hay bayura d’ellos. Dende Harry Potter, nel mio casu, como Marvel, Jurasasic Park, DC… To ello cola estética de les famoses figures Funko. Vamos ver les primeres impresiones d’esti Funkoverse Harry Potter.
Primeres impresiones de Funkoverse (Harry Potter)
El tema de los Funkos creo que ya trespasó lo der ser una “moda”, ya ye daqué habitual de ver en cualquier tienda o gran superficie. Yera raro que nun sacasen nengún xuegu aprovechando’l tirón que tienen. Pos equí lu tenemos… La mesma empresa que ficiere el Harry Potter Hogwarts Battle , saco diferentes universos pa poder xugar y combinar. Yo en mio casu tengo la caxa d’aniciu de Harry Poter.
Tamos ante un xuegu d’enfrentamientu que se pudiere dar un aire a un dungeon crawler pero nel que nos tenemos qu’atizar ente nos. Digo “dungeon crawler” porque tenemos una serie de miniatures (los funkos) en tableros de batalla que son cuadricules y xugamos habilidaes y poderes. Pero fuera d’ehí nun hai mayor similitú. Al menos nesta caxa tenemos un escenariu d’aniciu y varies misiones ya pa cuando tengas el xuegu domináu. El xuegu en si nun me paez que seya mui complicáu de xugar. Selecciones un de los tos personaxes que nun t’agotáu y faes dos aiciones con él. Movete, habilidaes propies, hai delles que pues usar.
Obvio que ye un xuegu táuticu, y lo más sorprendente pue tar nel so sistema d’usu d’habilidaes y reutilización. Pa usar les habilidaes del personaxe ties que gastar una ficha de la su reserva col mesmu iconu y una vegada la uses va a la tabla de reutilización. Si nun ties ficha, nun pues usar el poder. Estes fiches van baxando pol track hasta que salgan del tableru, momentu que les pues coyer y volver a usar. Ye equí onde pues combinar les habilidaes de los personaxes e intentar llevate’l gatu al agua na partía.
Nos solo xugamos un par de vegaes al escenariu básicu,(que ye basicamente acabar con toles figures del rival, (d’ehí les primeres impresiones) pero hai dellos escenarios y oxetos más na caxa qu’añaden esi componente táuticu. Amás, si nun toi equivocáu, nel restu de caxes vienente más pudiendo combinar universos diferentes y poder xugar. Al final ye un xuegu d’enfrentamientu que nun se sal munchu de madre si solo merques los personaxes qu’a ti te presten. Por exemplu nel nuesu casu vienen Hermione y Harry por un llau y Bellatrix y Voldemort per otru. Pero hai una espansión pequeña con Ron y Draco.
Resumen final
Vamos col resumen d’estes primeres impresiones de Funkoverse (Harry Potter), un xuegu d’enfrentamientu (d’entamu pa dos xugadores) nel que vamos a manexar los famosos funkos escontra l’otru xugador n’una especie de dungeon crawler sin llegar a selo al nun tener tema nengún salvo los escenarios por onde andes. Coles partíes echaes, y cosciente de que solo rasque un pocu, ye un xuegu que nun me fai esplotar la cabeza pero que pa echar una partía dacuando pue prestar. De xuru que cuando esplore los escenarios y oxetos el xuegu cambia bastante. Si que me paez prestoso el tema de les habilidaes y reutilización, que nunca lo había visto n’un xuegu, al menos que yo m’alcuerde.
Lo bono que tien ye que ties unchos universos pa mercar, Harry Potter, Marvel, DC… Pudiendo escoyer el que más te preste e incluyio mezclalos. Por supuesto que si l’estética Funko te presta, va prestate velos na mesa. A mi realmente nun me da más por ella.
Y na más por güei. ¿Xugasteis a dalgún Funkoverse? ¿A qué universu? ¿Prestobos? A ver si xugando más partíes y esplorandolu bono m’afaya más. Pero eso contarevoslo nel Falando De correspondiente. Gracies por lleer!