Xuegos con temática espacial ya hai munchos, ye verdá. Pero con una caxa tan pequeña ya nun hai tantos, o al menos yo no los coñuezo. Vamos ver les primeres impresiones n’asturianu d’esti Pequeñas Grandes Galaxias que nos trai Devir

¿De qué va Pequeñas Grandes Galaxias?

Nes profundidaes del espaciu, la to galaxia ta superpobla, asina que solo queda una opción pa la supervivencia… Espandise a otres galaxies. Pero nun vas ser l’únicu. Otros imperios van tar na mesma situación. Se’l más astutu, coloniza les galaxies adecuaes y se quien tenga’l control del universu.

Pequeñas Grandes Galaxias ye un xuegu de la llinia de los “Pequeños Grandes” de la editorial madre Gamelyn Games y que nos trai en castellán Devir. Da fechu, esti xuegu ya salió va unos años, pero esti branu volvieron a imprimilu asina que lu tenemos disponible. En mi casu, pa estes primeres partíes prestómelu Diego (milenta gracies)

Primeres impresiones de Pequeñas Grandes Galaxias.

Como vos dixi nes entraes correspondientes de les novedaes de la selmana, tengo varios xuegos de’esta llinia entre ceya y ceya. Pequeñas Grandes Mazomarras, Pequeños Grandes Piratas, Pequeños Grandes Dinosaurios, estos son nueves espublizaciones d’esti añu. Pero tamién esti que yera un xuegu más vieyu. Tuvi la suerte de que me lu prestaren pa probar n’antes de mercalu (cosa que vos recomiendo facer a tos con cualquier xuegu si tenéis l’oportunidá). Asina que vamos con eses primeres impresiones de Pequeñas Grandes Galaxias.

Vamos primero colo más evidente. La caxa… Nesa caxuca entren tolos componentes del xuegu. Que son basicamente unes cartes, unos dados y les pieces de xugador en diferentes colores. Esto solo basta pa montar el xuegu. Tamos ante un xuegu competitivu nel que la mecánica principal son unos dados que te van dicir lo que pues facer durante’l turnu. Esto quiciabes pa los que nun yos guste munchu l’azar puea ser una pega. Pa mi personalmente reflexa mui bono les “adeversidaes” nel espaciu esterior. Y eso que nuna de les partíes qu’eche, la suerte nun tuvo conmigo y perdila.

Pero’l xuegu date mecanismos pa intentar engañar a la suerte, pudiendo repetir un dadu gratis, o tirando más dados si consigues xorrecer el nivel del to imperiu. No obstante l’azar ta ehí. Tamién un toque de xestión de recursos. Vas tener dos, enerxía y cultura, qu’hai que controlar y xenerar pa diverses aiciones que quieras facer durante la partía. Por exemplu facer crecer l’imperiu, o repetir dados. Hai más. Pero lo más curioso ye que gracies a la cultura pues facer aiciones nel turnu d’otros xugadores, copiando un de los sos dados. Esta vuelta de tuerca paezme perinteresante.

Aterrizar nel planeta coles naves, llevales a órbita pa colonizalos y llueu poder usar les sos aiciones… Los movimientos son varios y les opciones munches, siempre que los dados te lo permitan o pueas siguir a un contrariu nel su turnu. To esto conviértese nuna carrera por llegar a los 21 puntos (pa finar la partía) y en colonizar los planetes más afayadizos dexandome una sensación guapa nes dos partíes que pudi xugar.

Pa finar

Vamos finando con estes primeres impresiones de Pequeñas Grandes Galaxias, un xuegu qu’el nome sientá-y perbono y qu’escuende un xuegu que pese a la so duración curtía, dexome mui bones sensaciones. Anque nun lo paezca paezme bastante temáticu nesa carrera d’alcanzar la colonización de los planetes y nesi “azar espacial”

Ye un xuegu que con estes dos primeres partíes danme ganes de comprar por paeceme, de momentu, un bon xuegu y fácil de que pueda da-y más partíes. Veremos si finalmente lu merco si caltengo les opiniones en la entrada de Falando De