Vi peles redes qu’esti ¿llibru-xuegu? Taba coyiendo muncha fama, un amestao de los llibros d’escoyi la to aventura y un xuegu de rol al usu. Asina que llanzeme a mercalu y fa-y unos días entamelu. Vamos ver eses primeres impresiones de “En las Cenizas“. To sin spoilers claro ta, nun pretendo fastidiar la esperiencia a naide.

¿De qué va “En las cenizas”?

El xuegu de “En las cenizas” cuenta la hestoría d’un rapaz güérfanu de la isla d’Obor, un mundiu imaxinariu inventáu pol autor, Pablo Aguilera. Y no vos pueo contar muncho más de la hestoria si nun queréis que vos la fastidie 😛

Lo que si vos pueo contar qu’el xuegu aspira a ser un dungeon-crawler al más puru estilu de Descent, Imperial Assault y demás pero en sin miniatures y dados. Solo col llibru y un llapiz nun tienes falta más. Tamién que ta pensáu pa xugar en solitariu pero que naide quita de que lo faigáis en grupu.

Primeres impresiones de “En las cenizas”

Estos días de branu, nel qu’el tiempu pa xugar ye escasu, o al menos pa mi, si nun vas pa un llau vas pa otru. Esti tipu de xuegos portables son mui bona idea. No quita que n’un día d’iviernu pues tar xugando y lleendo nel sofá, solo faltaba. El casu ye que llevalu nun t’ocupa na y entamar a xugar ye un momentu.

Porque realmente ye asina, nun llevo xugando muncho pero vas aprendiendo a xugar col pasar de la hestoría, va metiendo cosines nueves, nueves regles, enemigos colos que lluchar, decisiones que tomar que van repercutir nel futuru del xuegu… Creo qu’eso ye un puntu mui a favor de “En las cenizas”.

El tema de buscar una esperiencia paecía al, por exemplu, l’Imperial Assault d’otra manera… Pos bono… Pa mi parte de la gracia ye ver les miniatures, tocales moveles… Pero eso va a gustos. Nesti casu resuelvelo con unos mapas de cuadricules na que pues dir moviendo al to personaxe, y los enemigos, o personaxe no xugadores, van movese por unes regles que te va marcando’l xuegu. Pa mi no ye la mesma sensación, pero tamién digo qu’el poder facer “algo paecío” en cualquier llugar sin l’engorru d’andar montando l’escenariu ye prestoso.

Nes fases nel que nun hai alcuentros, el xuegu funciona de la mesma manera qu’un xuego d’escueye la to aventura. Va proponiendote opciones y escueyes la que meyor te paezca. Ya nos alcuentros la cosa cambia, el xuegu proporcionate un mapa, unos turnos pa resolver l’encuentru y les aiciones del enemigu (lo que faen ca turnu) y una cuadricula coles tuyes. Pa les tuyes, el xuegu muestra una cuadricula con varies tarxetes, que vas tener que seleccionar y nun pues repetir, faciendo esto que seya un xuegu bastante tácticu (hai dalgún apunte más pero nun vos lu quiero esgranar).

En cuanto a la hestoria, al principiu nun avanza munchu, ye normal por otra parte, ta enseñandote a xugar entos avanza un poco más llento. Pero ya por onde voi yo, que tampoco ye mui lloñe, ya entama tornase interesante. Esti aspeuto creolu fundamental n’un xuegu d’estes carauterístiques. Tamién dicir qu’el sistema de guardau de partía ye muy cenciellu. Pa los que tenemos memoria selectiva y solo nos alcordamos de lo que nos paez 😛

Pa finar

Vamos col resumen d’estes primeres impresiones de “En las cenizas”. Tamos ante un xuegu que quier asemeyase a los clásicos dungeons-crawlers (Descent o Imperial Assault por exemplu) a la so manera. Pa mi asemeyase pero si me dan tiempu bastante pa xugar y montalo to, prefiero los primeros. Agora… Pa cuando nun ties munchu tiempu, o munches ganes de montar tola parafernalia, que nun nos engañemos a vegaes pasa, veolu un sustitutu perfeutu.

El fechu de que vayas aprendiendo a xugar a midía qu’avances na hestoria fai que sella abrir y xugar con un sistema de guardáu de partía bonu y rápidu. La hestoria paez entretenía, pero claro, n’estos xuegos ye crucial que t’enganche. No obstante tien bona pinta y con un componente estratéxicu que-y da más empuxe que solo decidir pa onde tires. El fechu de que nun necesites de na, salvo un llápiz, tamién ye de mención. El restu ta to nel llibru.

Y na más, veremos si aguanta la hestoría’l pasu del tiempu, pero de momentu ta dandome bonos ratos cuando lu pueo sacar, y sobre to n’esta época qu’el tiempu pa xugar tengolu un poco más llimitáu. Ya veremos na futura entrá de Falando de… Si caltengo les sensaciones.