La selmana pasa tuvi la suerte de participar nel Tranjis Day na tienda Identidad Secreta de Xixón. Ellí pudimos prebar tanto les últimes novedaes como lo que ta por venir de la editorial. L’intención d’esti post ye contavos un poco les sensaciones de los xuegos tres d’unos pocos turnos. Vamos col Tranjis Day n’Identidad Secreta Parte 2( equí vos dexo la parte 1) (n’asturianu) col motivu de la presentación d’ Identidad Secreta

Lo primero de to ye disculpame, na mi estrema llucidez nun saque semeyes, ni del eventu ni de los xuegos. Voi comentar dos xuegos n’esta entrá, farelo per enriba y tres de dalgunos turnos, polo que sedrán unes primeres, primerisimes, impresiones, que creo fadrán l’idea de por onde van los xuegos. Dar les gracies dende equí a la tienda, la editorial y los compañeros de xuegu. Entamamos.

Identidad Secreta

Vamos col xuegu cuya presentación orixino’l Tranjis Day. Identidá Secreta ye un xuegu de tipo party de 3 a 8 xugadores nel que por mediu d’iconos tenemos qu’intentar qu’adivinen el perssonaxe que tratamos de describir. Ca xugador va recibir una pantalla con 8 llaves del so color y tarxetes d’iconos poles dos cares (ca una tra-y dos iconos) El xuegu va desendolcase en 4 rondes nes que lo primero que tenemos que facer ye , al azar y sin velo naide, coyer una llave que nos marque un de los 8 personaxes que sedrá’l que nos toque representar.

¿Qué facemos pa representalo? Usar les tarxetes d’iconos. Creo que yera un máximu de 4 tarxetes (y 1 iconu por tarxeta) Pa ello tenemos dos zones, la roxa y la verde. Na verde pondremos dalgo que creyamos representa al personaxe o un aspeutu positivu d’él, y na roza daqué seya negativo o opuesto a él. Una vegada lo tengamos tos, tendremos qu’adivinar los personaxes del restu. Cuando los faigamos, coyemos una de les nueses llaves y ponémosla, col númberu de personaxe que creyamos, nel tableru del xugador. Cuando to se revele, puntuaremos 1 puntu por aciertu y otru más por ca xugador qu’acertase el nuesu personaxe. Tres d’esto, retiramos les tarxetes d’iconos, cambiamos los personaxes y entama una ronda nueva.

Como veis nun tien dificultá nenguna, pero’l tema de dir retirando tarxetes da-y un puntu mui dvertíu y fai usar les menos tarxetes posibles, nun seya que les necesites llueu. Nel mio casu, na cuarta ronda, tocome representar a Cristina Pedroche, y colos que tenía nun había manera hahaha Ehí ta la gracia’l xuegu La verdá ye que foi mui entreteníu, xugamos 4 , pero a 8 tien que selo más tovía. Ya no solo’l xuegu, sino ver como ca persona representa d’una manera radicalmente opuesta a la tuya. En cualquier alderique esti xuegu trunfaría.

Mistery House

El siguiente xuegu que pudimos prebar foi Mistery House, esi xuegu lleva un tiempu a la venta. Nun puedo falar munchu d’él ya que xugamos la partida tutorial que nos llevo lliteralmente 5 minutos. Nesti xuegu tenemos una caxa con varios furacos y varies cares de cartes puestes en vertical que tapen los furacos. Tendremos que mirar y ver que vemos nes diferentes habitaciones que presenta y mediante una app de movil dir resolviendo’l misteriu. Como digo nun pueo opinar munchu, tien bona pinta pero con esti casu tan pequeñu dio pa ver como se xugaba y ya.

Océanos de Papel

Toca Océanos de Papel, un xuegu que nun tenía nel radar. Tamos ante un xuegu de cartes que la mecánica principal ye’l Set Collection. Pues facer varios tipos, pareyes de símbolos que tienen unos poderes cuando los xuegues y dan puntos al final. Estos hai que xugalos y facer l’aición al momentu. Recopilar na mano otru tipu de símbolos, a más ties, más puntues. Tamién pues recopilar sirenes, que puntues los grupos de colores. Hai delles maneres.

La mecánica principal ye simple. Hai un mazu y dos montones de descartes, nel tu turnu pues o bien robar dos del mazu y descartar una o bien garrar la primera d’un de los mazos de descarte. Tamién pues xugar les parejes especiales que pueas, peros siempre ties que xugar la parexa. Y ya ta, eso ye’l xuegu. Lo que si me paez entretenío ye la forma de finar la ronda. Nel momentu que daquién tenga 7 puntos, pue o dicir que se termina y tos mostramos los puntos o permitir xugar un turnu más al resto. Si esi xugador gana el restu solo puntua pol grupu de color más grande y viceversa. Si pierde’l que desencadenó esti final, puntua solo pol grupu de color. Esto solo val pa l’opción de permitir una ronda al restu.

Una vegada fecho esto, apuntes la ronda y tornariase a xugar hasta que daquién llegue a 30 puntos, creo. Y con solo esto crease un xuegu la mar, nunca meyor dicho, d’entreteníu. Que ties que tar mirando lo que cueye o no cueye’l rival pa llueu facer númberos de lo que tien, y esi xiru de como se va a ganar da-y esa emoción de llanzate o non. L’arte, que nun lo comenté, ye figures d’origami que la verdá sin ser una maravilla ye agradable a la vista y la simboloxía ayuda a coyelo to rápido.

En definitiva, una sorpresa mui agradable. Nun lu conocía y paezme un xuegu mui entreteníu. Creo que sal pal segundu semestre d’esti añu.

Turing Machine

Y vamos col caberu de los xuegos, Turing Machine, otru de los xuegos presentaos n’Essen l’añu pasáu y qu’esperase tamién pa finar d’esti añu. El xuegu ta basáu na maquina de Turing, la famosa maquina del científicu computacional Alan Turing qu’ayudó a descifrar los códigos d’Enigma. Pues equí fadremos eso, descifrar un códigu. Ye un xuegu de deducción competitivu.

Vamos tener nel centro la mesa un hexágonu, con una lletra axina a ca llau y d’elles saldrán delles rames en función del escenariu. Estes rames sedrán les condiciones que vamos chequear col nuesu códigu. Como dixi, ye un xuegu de deducción, tenemos qu’adivinar un códigu de 3 cifres. Pa ello, en secreto, diremos apuntando’l códigu que creamos que ye y podemos realizar hasta 3 chequeos coles condiciones de la mesa. Estes condiciones nun nos van dicir un númberu exactu, sicasi sedrán los que nos ayuden na deducción. Por exemplu, si ente los tres númberos hai más pares qu’impares. Que la suma de los dos primeros puea ser igual, mayor o menor qu’un númberu, etc.

Diremos faciendo esto y apuntando to na fueya de control que mantendremos en decreto. Apuntaremos tanto los chequeos que faigamos como cualquier información que creyamos útil. Nun lo dixi, pero pa facer los chequeos coyeremos les plantilles colos códigos que queramos mirar, n’orde, y pondremosles encima la fueya de chequeo pa que nos de la información.

Ye verdá que foi l’últimu que xugamos y foi un poco a la carrera. A mí al menos, costome un poco entender la información queme daben los chequeos, pero una egá entendío ye un xuegu mui de da-y a la tiesta perinteresante que creo que nun creo qu’el tiempu de partía seya mui llargu y qu’amás me paeció ver que tenía munchos casos pa resolver. Sí que me presto’l tema de que solo cola pregunta nun sacases el númberu, por bona que seya ties qu’andar usando la llóxica y sofitate nes ya feches. Perinteresante esti Turing Machine

Semeya tomádel usuariu @Joeycorrs de la BGG

Finando’l Tranjis Day n’ Identidad Secreta, parte 2

Y finamos col Tranjis Day. La verdá ye que salí bastante contentu colos xuegos que prebamos. Si lleisteis la parte 1, veréis qu’el que menos me presto foi Ganimedes, sin paeceme mal xuegu.Creo que tien un bon añu per delante Tranjis Games, veremos si al final to va por bon camín. ¿Vosotros tenéis dalguna predilección? ¿Cuál esperáis más? ¿Prebasteis dalgún? ¡Tengo gana lleevos nos comentarios! ¡Gracies por lleer!

Semeyes cedies pola editorial y la Tienda Identidad Secreta