Sumerxete nos mundos del prolificu escritor de Providence, H. P. Lovecraft. Investiga les desapariciones, y los sucesos que pasen nes cais d’Arkham, llucha escontra’l horror que s’avera. Afayaivos n’esti Arkham Horror LCG n’asturianu

Asturianu

Ficha:

• Xugadores: 1-4
• Duración: 1-2 horas
• Edá: 14+
• Editau por: Fantasy Flight Games
• Autor: MJ Newman, Nate French
• Ficha na BGG

Conteníu:

• 5 Cartes d’Investigador
• 5 Cartes pequeñes
• 111 Cartas d’Escenariu
• 245 Cartes de xugador
• 61 Fiches de Recursos
• 44 Fiches de Caos
• 27 Fiches d’Horror
• 40 Fiches de Daño
• 57 Fiches de Pista/Horror
• 1 Guía de Campaña
• 1 Reglamentu pa aprender a jugar
• 1 Guía de Referencia de Regles

De que va Arkham Horror LCG

N’Arkham Horror LCG vamos tomar el papel d’investigadores de socesos nos años 20 na ciudá ficticia d’Arkham (en postreres ampliaciones diremos a más llugares). Ambientáu nos Mitos de Chtulhu, vamos tener qu’investigar, lluchar e intentar facer que los diferentes cultos nun se salgan cola suya.

Arkham Horror LCG ye un xuegu collaborativu y narrativu nel que los xugadores van tener que facer lo posible pa que les diferentes sectes nun consigan el so oxetivu. Ye un xuegu de campaña, na que lo que prima ye la hestoria que vives. Vamos cola opinión d’esti Arkham Horror na so edición revisá

¿Qué ye un LCG?

Como ficimios en Marvel Champions, vamos facer un repasu de que ye un LCG. LCG son les sigles de Living Card Game, son xuegos que van tener munches espansiones pero a diferencia de los xuegos de cartes coleicionabes, siempre sabes lo que merques. A diferencia, por exemplu, de Magic que cuando merques un sobre, nun sabes les cartes que te vienen, equí cuando merques una espansión, a tos nos van venir les mesmes cartes. Nos packs antigüos, los packs d’espansión solien venir ca 2-3 meses los pequeños y ya ca 6 o más los grandes. Na nueva versión, vamos tener dos productos: una caxa d’investigadores, coles cartes d’investigador, y una de campaña, que salen ambes ca, más o menos, 6 meses ca ciclu (ambos packs) Como podéis imaxinar pue convertise nun xuegu mui caru. Pero d’eso ya falaremos mas alantre.

¿Que me paez Arkham Horror LCG?

Si me permitis nesta entrá, nun voi falar de como se xuega a Arkham Horror LCG. Creo que daquién sabe ya xugar más o menos, amás que d’esti xuegu concretamente nun se yo si dalgo escrito diba a esplicame yo bono o de la manera correuta pa que s’entienda. Pa deprender a xugar tenéis dellos videos en Youtube, o la páxina web especializá del xuegu Los Archivos de Arkham. Nun quiero dicir que seya dificil de xugar ¿eh? Realmente ye siguir unos pasos bastante cenciellos, anque con dalguna regla especial y demás como suel ser habitual. Pero pa la preparación del escenariu, subida de nivel y demás pue cambiar bastanti en función del escenariu que vos toca. Si vos presta, toi a ver si faigo diarios de campaña coles mis partíes. Tengo l’entamu equí por si vos presta.

Producción

Vamos entós direutamente cola opinión d’esti Arkham Horror LCG na su versión revisá, que básicamente ye un cambiu de formatu del productu. N’antes teníes que mercar dos caxes pa tener todo’l “pool” de cartes y agora n’una tieneslu. Creo qu’esto foi un aciertu, el cambiu en xeneral. Agora ties tolos componentes n’una sola compra, sin facer puzzles. Esto va acentuase nes postreres espansiones, pero nun ta demás dicilo. Amás, agora bien con un insertu pa les cartes, la bolsa del caos (la primera versión nun venía…), dalguna semeya col arte cambiáu…

En xeneral foi un cambiu pa meyor. Ye más, dicivos que yo teía una sola caxa de les antigüees y vendila pa mercar esta. Tamién, que se m’escaecía, vien dalguna carta qu’antes veníen n’otros ciclos, pudiendo facer mazos más diversos. El resto ye básicamente como tener dos caxes de les antigues, Algo más barato. Bien por esti llau.

El xuegu

El xuegu, y toi fixu que a daquién-y entrugues va decite lo mesmo, ye mui narrativu y temáticu. Toles regles y mecániques van n’esa direucción. Respeuto a la narratividá, pa mi opinar ye’l más narrativu de los 3 LCGs cooperativos qu’hai. Marvel Champions apenes lo ye, y El Señor de los Anillos nun creo que lliegue a estes cotes que si llega l’Arkham Horror. Equí cuentente una hestoria, qu’en función de los tos resultaos va desendolcase d’una manera o d’otra. Ye por esto qu’esti xuegu sin facer la campaña completa pierde un poco’l sentíu de xugalo. Nel casu que quieras xugar una partía de cuando en cuando, quiciabes nun ye’l meyor xuegu pa ello, perderíes daqué fundamental que lu fai brillar. Temáticu ye abondu, rezuma Lovecraft polos poros, y pese a que la primera campaña ye curtía, ye prestosa de xugar y mui esfrutable

Veolu un xuegu rexugable, hasta ciertu puntu. Ye verdá que nun siempre les partíes salen de la mesma manera y puen desendolcase de diferentes formes y qu’en función del investigador, vas enfocales d’una manera o d’otra. Pero caro, si xuegues la Noche de la Fanática 4 veces, dexará de sorprendete. D’ehí les milenta campañes aicionales que sacaron ya, pero eso pa más alantre. Pero si xuegues de pascua en ramos… Ye bastante prestosa. Por exemplu, yo ye la tercera vez que la xuego con esta y si que me sonaben coses, pero esfrutela igualmente. Eso sí foron siempre con diferentes investigadores. Tengo pendiente entamar la primera de les campañes llargues, El Legado de Dunwich.

Llueu ta l’aspeutu de crear los mazos d’investigadores. Habrá daquién qu’eso-y paecerá un peñazu. Nun vas ser ni’l primeru ni’l caberu. Si yes d’estos, Arkham DB ye’l to meyor collaciu. Si te presta la construcción, equí ties hores de metaxuegu pa facer les combinaciones que más te funcionen y preparar al to investigador pa la campaña. Y tocante a esto, tamién lo prestoso que ye’l tema de dir desendolcando’l to investigador cola esperiencia que ganasti. Comprar cartes meyores pa facer l’investigador más poderosu, dando asina tamién narratividad y evolución nel xuegu.

Ye un LCG

Esto paez una tontería, pero hai que dexalo claro. Pue ser un xuegu mui caru si termines mercandolo to. Si vas mercar toles campañes que ya salieron, y les que tan saliendo agora, quiciabes teníes que falar con Fantasy Flight y que t’embarguen la nómina pa pagar :D. O pues facer como yo, que ye dir mercándo dacuando lo que me vaya prestando pue ser un gastu conteníu y que te d’hores de xuegu a baruyu. Si que me paez, tamién, qu’el marcar dalguna de les campañes ye necesario nesti casu, como dixi enriba pue ser que quemes la caxa básica.

Resumen Final

Vamos col resumen final d’Arkham Horror LCG, un xuegu nel mundiu de los Arkham Files (mitos de Chtulhu) siendo’l más narrativu de los 3 LCGs cooperativos que tan nel mercáu actualmente. Un xuegu mui prestosu de xugar, pero que si nun vas completar la campaña nun te merez la pena de mercar, ni de xugar si m’apures. La diversión d’esti xuegu ta nel viaxe, polo que ye un xuegu que necesita hores pa esfrutalu bono. Ya pa finar dicite que si entres nesti mundiu, ties que facete a la idea de que vas gastar perres en dalguna campaña, vas querer vivir más aventures, l’aventura que trai la caxa igual se te queda repetitiva o ya nun t’apetez tanto xugala.

Arkham Horror LCG va prestate si:

• Afayente los mitos de Chtulhu
• Quies una esperiencia de campaña
• Busques un xuegu collaborativu
• Quies un xuegu con un mui bon solitariu (pa entamar con dos investigadores)
• No tienes problema por tener munches espansiones o si vas a tiru fixu a la campaña que quies

Arkham Horror LCG nun te va prestar si:

• Busques un xuegu pa partides casuales
• Yes completista pero nun te quies dexar el sueldu.
• Los LCGs no son santu de tu devoción.
• Los mitos de Chtulhu pa quien los quiera 😀

Y tu… ¿Ya prebaste Arkham Horror LCG?¿Que te paeció?¿Que LCG te presta más? Dexámelo en comentarios, o cualquier entruga o dulda que tengas! Gracies por lleer!