Ye una época de conflictos na galaxa, cuando non. Asina que decidí resolvelos de la meyor forma que se m’ocurrió. Mercar dos mazos iniciales de Star Wars Destiny y prebalos 😛 Vamos coles primeres impresiones d’esti xuegu de Fantasy Flight Games, más concretamente la so variable Encounters n’asturianu.

¿De qué va Star Wars Destiny?

Star Wars Destiny ye un xuegu de cartes y dados coleccionables, al estilu Magic the Gathering, nel que vamos a enfrentanos a otru xugador. Ye por ello un xuegu competitivu nel qu’enfrentaremos a los nuesos personaxes, uno o mas, colos del contrariu. Nesti casu, lo que yo prebé foi la variante Encounters, que te permite xugar en solitario o en cooperativo.

Camentar qu’el xuegu en si ta cerráu. Pero hai munchu material que se ta saldando a preciu mui bonu. Da fechu, yo entame mercando dos mazos preconstruidos iniciales (Kylo Ren y Rei) y salieronme por menos de 10€ los dos. Llueu imprimi la variante y ficeme les cartes pa poder xugar a la variante Encounters

Primeres impresiones Star Wars Destiny (Encounters)

Esti xuegu tien un tiempu, 6 o 7 años fai que salió mas o menos. D’aquella mire pa otru llau, porque paecíame lo mesmo que Magic. Un xuegu pa competir y que ties que mercar sobres y tar faciendo baraxes ca poco, col desembolsu de perres conveniente. Pero agora, ya col xuegu cerráu, surdió esta variante que se pue xugar en solitario y xunto a que se ta saldando en munches tiendes animeme a prebalu.

Como dixi, ye un xuegu d’enfrentamientu nel que vamos tener qu’escoyer la nuesa baraxa, ye’l metaxuegu decidir que personaxes y cartes vamos meter. Pa ello, y mui per enriba, escoyemos una faición. Bonos o malos, y llueu en función de los héroes y del so color, vamos poder meter cartes al rodiu d’ellos que seyan d’esos colores o neutrales. Tamién tenemos qu’escoyer un terrenu de batalla ca un. Esti pasu de construcción nos saltamoslu al venir los mazos fechos.

Una vez esto, la partida va desendolcase por turnos, nel que ca xugador va poder facer una aición. Activar personaxes, resolver dados, xugar cartes, reclamar campos de batalla… Hasta qu’un de los dos perda tolos personaxes o fine’l mazu y la mano. El xuegu en si nun tien muncha complexidá mas allá de construyir una bona baraxa y xugar les cartes con tinu.

Encounters

Pero vamos agora colo que realmente yo xugué y prebé, que ye’l sistema fan made Encounters (enlace n’ingles y una de les versiones en castellán). Esto ye un modu de xuegu que s’inventó un usuario de la BGG pa poder xugar en solitaria y cooperativo. Inventose les regles, y tamién los enemigos contra los que vamos lluchar. Vamos que se pegó un curro de munchu curiáu. Y llueu xente fizo la torna al castellán. Dende equí agradecimientos pa tos.

El xuegu pal xugador ye esactamente igual que’l modu “normal” mesmes aiciones, regles pa facer el mazu, etc. L’enemigu vamos tener que facer un mazu en función de la dificultá que querramos xugar. Les regles pa esta IA son tamién muy cencielles. Tenemos una lista d’aiciones, y va facer la primera de toes que puea facer. Si nun pue facer nenguna pasa. Si pasamos los dos, pos nueva ronda. Quitando un poco la pereza que pue ser facer les cartes tu (que siempre pues dir a una imprenta y que te les faigan) por 5-10€ € que me pudo valer imprimir encuadernar y demás, tengo una fartura d’escenarios… (Eso sí, echa la tarde pegando fueyes na cartulina y recortando hahaha)

Los escenarios son tematizaos, en función del enemigu qu’escueyas, coles habilidaes y nomes de les cartes mui bonamente selecionaes. Ye verdá que solo xugué dos partíes, y colos mazos d’aniciu, pero ye un xuegu tremendamente divertíu, y sin ser narrativu (al final ye pegase) ye mui temáticu. Les tos propies cartes y les de la IA faen que te metas nel universu de Star Wars. Tirar dados, esperando tener la suerte de que te salga lo que te val (o la fuercia 😉 ) intentar modificalos, resolvelos, tener curiáu de les armes del enemigo. Creo que l’autor d’esti sistema fizo un trabayu mui bonu. Ya vos digo, toi a ver si merco’l restu de los mazos d’aniciu, pa tener personaxes bastantes, y dalguna caxa de sobres qu’agora tan medio regalaes.

Pa finar

Vamos finando coles primeres impresiones d’esti Star Wars Destiny (Encounters) n’asturianu. Un xuegu que foi creau pa competitivo, pero que vicisitudes de la vida ya ta cerráu por parte de Fantasy Flight Games, pero que gracies a este modo de xuegu Fan Made, esfruta d’una segunda vida. Si lo que vos presta d’esti tipu de xuegos ye xugar unes pachangues colos collacios de cuando en cuando, ye un momentu estupendu pa entrar, mercar un mazo y unos sobres y ver quien ye’l que gobierna la galaxa. Pero si además sumes que pues xugar en solitario, n’un modo que ta mui bono, xugué poco pero nun me paez pa na un parche, ye como se diz na xerga un win-win. Áxil, temáticu, divertíu… Solo me prepare a Luke Skywalker (a ver cuando faigo’l restu de mazos) xugué dos partíes y partiome la cara, pa variar. Pero tengo gana de xugar los diferentes enemigos, colos diferentes mazos e intentar facer yo los mios.

Y na más por güei, espero que vos haya prestao la entrada. Ya veis que nun hai que mirar solo les novedaes, hai qu’echar güeyaes p’atrás ¡que salen cosuques perguapes! Veremos si col pasu de les partides digo lo mesmo nel Falando De ¿Ya conocíais el xuegu?¿Y la variante Encounters? ¡Dexámelo en comentarios!