Los recursos de la Tierra van finase, ye un fechu. L’humanidá tien qu’atopar otru sitiu onde vivir y el planeta roxu ye un bon candidatu. Güei traigo-vos l’opinión de Terraforming Mars Expedición Ares de Maldito Games n’asturianu.

Ficha:

• Xugadores: 1-4
• Duración: 60 min
• Edá: 14+
• Editáu por: Maldito Games
• Autor: Jacob Fryxelius, Nick Little y Sydney Engelstein
• Ficha BGG

Conteníu:

• 1 tableru central
• Más de 200 cartes de proyeuto úniques
• 4 tableros de xugador
• Más de 200 cubos y fiches
• 1 reglamenti
• 1 guía d’aniciu rápidu

¿De qué va Terraforming Mars Expedición Ares?

L’humanidá tien qu’espandise. Ya tien la teunoloxía y los recursos pa ello. El vecín planeta roxu, Marte, siempre foi’l nuesu anhelu. Agora lliego’l momentu de colonizalu y facelu habitable pal ser humanu. Nos vamos ser parte d’esi procesu.

Terraforming Mars Expedición Ares ye un eurogame de xestión de mano y selección d’aiciones simultánea nel que competiremos (normalmente) por ser el que más consiga terraformar marte. Vamos cola mio opinión.

¿Cómo se xuega a Terraforming Mars Expedición Ares?

Preparación

Pa preparar la partía de Terraforming Mars Expedición Ares vamos siguir los siguientes pasos. Nun ablucar, son unos cuantos pero son mui cenciellos.

• Colocamos el tableru central na mesa
• Colocamos les fiches indicadores de fase con la contrapuerta pesllá nos huecos de la drecha del tableru.
• Colocamos les fiches y cubos al alcance de tolos xugadores
• Colocamos los marcadores transparentes nos anicios de los tracks d’oxixeno y temperatura
• Ca xugador cueye: un tableru personal y un color. Damos les cartes de fase del mesmu color y pon un marcador nos diferentes tracks del tableru personal. Tamién ponemos uno na puntuación 5 de Valor de Terraformación (a partir d’agora VT)
• Baraxamos les cartes d’oceanu y colocamosles nel tableru central boca abaxo
• Baraxamos toles cartes de proyeutu, y damos 8 a ca xugador, el resu dexamosles al alcance de tos.
• Baraxamos les 8 cartes de corporación y damos 2 a ca xugador. Estos escueyen una y descarten l’otra. Una vez escoyía, obtien los recursos y habilidaes de la corporación.

Y ya ta! Podemos entamar a xugar!

Como se xuega

En Terraforming Mars Expedición Ares vamos tener 3 pasos mui bono diferenciaos. Vamos veles per enriba toos:

Paso de planificación

Nesta fase, y tolos xugadores a la mesma vegada, escoyeremos una de les 5 fases que queramos xugar. Ye perimportante alcordase de que nun se pue repetir fase dos turnos siguios. Una vez escoyía ponemosla boca abaxo y cuando tos la tengamos revelense al mesmu tiempu volteando les fiches de ronda de les fases seleccionaes.

Paso de Resolución de fases

Nesti pasu van dir xugando les diferentes fases escoyíes polos xugadores pol siguiente orde: Desarrollo, Construccion, Acción, Producción e Investigacion. Si nun s’escoyó dalguna, nun se xugaría esti turnu.

Hai que destacar, que tolos xugadores xueguen toles fases, pero na fase qu’escoyiste tamién xugarás la parte de bonificación de la carta

Vamos veles perriba.

Fase de Desarrollo:

Nesta fase xugaremos les cartes que nos faen producir coses dende el nuesu panel. Son les cartes verdes y podremos xugar 1. Alcuerdate d’axustar la producción el to tableru dempués de xugala.

Fase de Construccion:

Nesta fase construyiremos teunoloxíes o edificios que normalmente nos den aiciones pa facer llueu (cartes azules) o aiciones inmediates (cartes roxes). Podemos volver a xugar una carta de la mano, dos si escoyimos nos esa aición.

Fase d’aicion:

Equí podremos xugar una vegada l’aicion de les cartes que tenemos xugaes. Podemos repetir una si escoyimos esta fase. Tamién tenemos delles aiciones nel tableru de xugador. Estes si les podemos repetir, amás, si al final de la fase tenemos calor y plantes pa realizar una aición estándar, tenemos qu’usales.

Fase de Produccion:

Nesta fase, tolos xugadores recolecten los recursos equivalentes a la producion, calor, plantes, cartes… L’escepcion ye nos Millones de €, recaudaremos lo que produzcamos más el VT nesi momentu.

Fase d’Investigación:

Nesta fase, tolos xugadores roben dos cartes y quedense con una. Si esocoyisti l’aición robes 3 y quedeste con dos.

Paso Final

Nesti pasu tolos xugadores descarten cartes hasta tener 10 de máximo na mano. Vuelven a voltease les fiches de fase y entama una ronda nueva.

Como se gana

Nel modu normal, la partida fina cuando se Terraforma marte del to. Esto ye cuando toles llosetes d’oceanu tan descubiertes y los tracks d’oxixeno y temperatura tan al máximo. Xugares la fase en cursu y finará la partida. Ca xugador sumara’l VT + PV de fiches + PV de cartes, el que más tenga.. Gana!

Nel casu del modu solitariu, si nun consigues terraformar el planeta en 25 rondes… Perdiste. Si lo faes, ganasti.

Opinión final de Terraforming Mars Expedición Ares

Ya fixi en so día unes primeres impresiones de Terraforming Mars Expedición Ares, pero por una cosa o por l’otra, nun lu xugué munchu más. Foi nesta pasá selmana, que vi que salien les espansiones que lu volví a sacar, a ver si m’interesa meteme n’elles o col xuegu base tengo bastanti. Y como me sirvió a mi, pue qu’esta entrá tamién vos sirva pa coñuecer un poco’l xuegu si nun sabiais na d’él y al ver les novedaes d’esta selmana se vos apaeció. Camentar, que les partíes que xugué fueron en solitario, intentaré estrapolalo a como creo que funcionará a más xugadores.

Producción

Como siempre voi entamar pola producción del xuegu. Creo que ye bastante bona, por no decir mui bona. Con semeyes pa ca carta diferente y que son afayadices de ver, amás el tema de que te venga con unes bandexines pa los cubitos tokens y demás acorta munchu’l despliegue y recoyer. Según tengo entendío que ameyoró munchu respeuto al “orixinal” onde la calidá de los componentes nun diba mui allá.

Los tableros son de troquel gruesu que nun paecen combar. Vien, amás, con cartes a bayura. La verdá ye que toi percontentu nesti aspeutu col xuegu.

Al turrón

Vamos con lo que me paeció el xuegu en sí. Tamos ante un xuegu de xestión de mano nel que tienes que buscar daqué combinaciones coles cartes que xuegues pa maximizar los resultaos na terraformación de Marte. El fechu de que tenga cartes a bayura, fai que nun siempre veas les mesmes cartes y más si hai munchos xugadores y sumáo a les 8 corporaciones fai que la rexugabilidá seya bastante grande. Si que ve qu’una estratexa bona a siguir ye aprovechar munchu los beneficios de la corporación, Nun xugué con toes, pero coles que xugué suel ser un bon entamu pa plantear la partía.

Llueu ta’l tema de les aiciones simultanees y que se xueguen toes les que s’activen nesi turnu. Eso diría que ye lo que más me presta nel xuegu. Tanto nel modu solitariu, que la IA dirá sacando fases del mazu, como escontra otros xugadores ties qu’optimizar bien lo qu’escoyes pa poder facer coses en toles fases actives, si no pues atascate y llueu volver a coyer el filu pue antoxase dificil. Amás ties que xugar col tema de la bonificación, merezte la pena como pa escoyela tu o arriesgues un poco pensando qu’otru xugador va escoyela fixo. Esi xuegu mental que ties que facer prestame bastante.

¿Multisolitariu?

Por otru llau… diría qu’el xuegu nun tien apenes interacción, más allá de que se compartir el track d’oxixeno y temperatura (pudiendo facer el fin de partía cuando más t’interese) y el escoyer les fases. Pero más qu’iteracción yo diría que ye xugar un poco colo qu’esperes que faiga’l contrariu. Ye por eso que creo qu’el solitariu funciona perbono. Faes lo mesmo y tien esi puntin de carrera de tener que terraformar marte nun númberu de rondes, en sin importar los puntos.

Tema

Si bono’l tema ta lleváu bono y más o menos ves que tienen sentíu les cartes colo que se fae y no que sería un procesu de terraformación d’un planeta. Tampoco veo que seya’l so puntu fuerte. Ye de fechu qu’estes mecániques son prauticamente les mesmes que Race For The Galaxy (que nun prebe) pa que vos faiga-ys una idea. De toes formes salvo alguna cosa de que puedas xugar según que cartes al principiu de partía que sedríen más de lo cabero… No veo qu’el tema desentone y creo que ta entreteníu.

Resumen final

Vamos col resumen de l’opinión d’esti Terraforming Mars Expedición Ares, un xuegu de xestión de cartes (y recursos) y planificación d’aiciones nel que tenemos qu’intentar terraformar el planeta roxu de la meyor forma posible o, si xuegues en solitario, enantes d’un tiempu dau. Creo que ye un xuegu prestosu de xugar que ves como a midía que vas progresando vas pusiendo facer munches más coses y sientes esa sensación de tar faciendo algo. La parte d’escoyer les aiciones ye la que más me presta, teniendo que da-y una piensá a ver lo que t’interesa más xugar agora o lo que pudiere xugar l’oponente o la IA. Ca vegada que lu xuego dexame una sensación agradable viendo como’l planeta evoluciona y al ser prauticamente multi solitariu creo qu’escala mui bono a cualquier númberu de xugadores. Por cierto, el modu solitariu prestame abondu.

Si bono no me paez que seya lo más temático del mundiu, esti aspeutu acompaña, y si sumamos que tien una producción perbona (sobre to en comparación col xuegu padre) creo que lu faen d’una calidá preciu curiosa si te gusten esti tipu de xuegos. El tema de les bandexuques creo que ye un puntu mui a favor a l’hora de xugar pero sobre to a la hora de recoyer.

¿Pegues?

Quiciabes podría decise qu’a más xugadores ves más cartes y faeste una idea de que pue contener, pero al nun haber carta repetía nun creo que seya mayor problema. El problema ye baraxar el balagar de cartes que tien… O lo faes a montones o ye percomplicáo.

Terraforming Mars Expedición Ares (n’asturianu) va prestate si…

• Quies un xuegu de facer aiciones simultanees.
• Un xuegu con bon solitariu pero que pues sacar con más xugadores en sin problema
• Quies un xuegu de gestión de cartes/recursos
• La temática de terraformar, o l’espaciu prestate.

Terraforming Mars Expedición Ares (n’asturianu) nun te va prestar si…

• Quies un xuegu con mucha interacción
• El tema ye importante y de pesu pa ti
• No te gusta xugar turnos simultáneos.

Y na más por güei ¿Xugasteislu? ¿Qué vos paeció? ¿Xugasteis al padre? ¿Cuál creeis que ye meyor? ¡Quiero sabelo! Ya sabéis onde 😛 ¡Gracies por lleer!