Caminar pola nueche pue convertise n’una de les tos peores pesadilles si t’atopes con dalgún depredador nocturnu…. Sangre Nueva (ast) ye un suplementu pa Vampiro La Mascarada 5ª edición, de Nosolorol, que vien a ser una especie de guía d’aniciu por onde adentrase al Mundo de Tinieblas.

Son delles les caxes d’aniciu de les que fale per equí, por exemplu’l Kit Esencial de Dugeons and Dragons o la Caja de Iniciación del Anillo Único, la verdá ye que suel ser un material que me presta lleer, por ver esi enfoque pa xente nueva qu’entra amás de que suelen traer coses como tresfondu o materiales que suelen ser útiles pa xugadores habituales como los que nun lo son. Güei toca falar de Sangre Nueva, el suplementu d’iniciación de Vampiro La Mascarada 5ª Edición.

Edición física de Sangre Nueva.

Lo más chocante ye’l formatu d’esti suplementu. Tamos acostumaos a les caxes na que vienen pues un par de llibros, dados, daqué material como mapas o tarxetes… Nesti casu ye un llibru, ni más ni menos. De tapa blanda a to color y d’unes 80 páxines. Yo tengo’l llibru básicu de Vampiro la Mascarada 5ª edición en versión PDF, y les semeyes y el formatu paezme per curiáu y acorde col tema del xuegu, esti suplementu vien a confirmame lo que suponía. Los aspeutos visuales paecenme mui bonos, pue gustate o non l’estilu y demás, pero esto tamién ye verdá. A mi, dafechu, si que me presta con semeyes con estilu realista.

Sangre Nueva ye de fácil llectura, tando estructuráu por un llau l’aventura (de la que nun vamos falar pa nun facer spoilers), una guía de referencia coles regles más en detalle del sistema y llueu los personaxes prexeneraos que si nun, m’alcuerdo mal son 7. Ye fácil siguilu y atopase to más o menos rápido. Si que tien cosuques como por exemplu nel tema de l’adautación de los dados de 10 cares normales al xuegu. El llibru va falate en función de los dados oficiales del xuegu, que recordemos nun vienen nel suplementu. Sicasi, trai un modo d’adautalos, pero nun ta na páxina que diz el llibru, tan un poco más alantre. Sí, ye una fatá, avance un par de páxines y ehí taba, pero paezme que ye de mención.

Dados

Por contrapuntu, y pol fechu de ser un material orientáu a quien entama nos xuegos de rol o nel mundiu de Mundo de Tinieblas, si qu’echo de menos unos dados anque fora. Nun dexen de ser dados de 10 cares. Pues atopalos en cualquier tienda del hobby, pero siempre ye d’agradecer. Quiciabes en comparación con otres caxes, solo entrando nel material físicu y non nel conteníu que vamos con él agora, pudiera ser un pelín caru en preciu.

Ambientación de Sangre Nueva

L’ambientación ye clara, la de Mundo de Tinieblas. Y más concretamente nun mundiu contemporaneu al nuesu, nel qu’esisten delles criatures sobrenaturales como vampiros, lo qu’equí nos toca, homes llobu etc. Dafechu l’aventura nun ta ambientá en nenguna ciudá n’especial. Podríes facelo na tuya, pero si que te da detallinos de como taría la situación. Otra cosa a mentar ye que ye un xuegu de +18 años (recomendaos) pol conteníu y los temas que trata, pero que te da los mecanismos pa regular y marcar los llímites que los xugadores y narrador nun quieran xugar.

Pero, y dixebrao a otres caxes, si que veo qu’equí cobra mayor protagonismu. Ya nun porque te cuente na del pasáu de los cainitas (los vampiros) si no porque cueyen especial importancia tolos temas de como se rellacionen col mundiu y col ser que son, la bestia interior. Por supuesto qu’esto ta nel llibru básicu, pero pa esti xuegu veolo especialmente necesario sabelo dende‘l principiu. Ye verdá qu’estos aspeutos los xugadores, y el narrador, van deprendiendolos col pasu de l’historia, pero creo que ye importante remarcalo. L’ansia, la vitae(la sangre), los conceutos de Camarilla , Anarquistas, Inquisisción y sobre to la llucha interna escontra la bestia de los personaxes que nesti casu disten bastante de ser los héroes de l’historia. To eso van dir viendose durante la partía.

Sistema

El xuegu, como nun podía ser d’otra manera, trai les regles básiques pa xugar pero incluyendo tos esos conceutos que vos comento arriba que creo son imprescindibles pa entender el mundu y la sociedá vampírica. Como camenté enriba tos se va a basar en tiraes de dados de 10 cares, nos que los ésitos van se resultaos de 6 o más. La cantidá de dados a tirar sedrán normalmente la suma d’un atributu y una carauterística. Pero… Tamién tenemos los dados d’ansia (Dados de 10 d’otru color) que nos faen percibir esa llucha del personaxe cola Bestia interior. Si gana, los resultaos puen ser poco agradables. Estos dados d’ansia van dir creciendo y menguando en función de los poderes de vampiru qu’uses y t’alimentes respeutivamente y siempre van tar presentes, como la bestia.

Por eso vos digo qu’esos aspeutos veolos mui sincronizaos ente sistema y ambientación. Pero nun solo equí. Obviamente nel manual completu tamién. Se que quiciabes ye un resumen mui someru pero ye la base onde xira to, por supuesto con matices. Pero pa que vos faigáis una idea creo que ta bono.

Aventura

Y a colación, de l’aventura lo único que voi dicir, y dafechu dizlo’l propiu llibru, ye que ye llinial pero creo que va ser bastante entretenía y facer que los xugadores asimilen los conceutos de lo que se van a topar na no-vida. Vamos, na vida vampírica.

Opinión final

Vamos cola opinión final d’esti Sangre Nueva, un sitiu onde entamar a xugar a Mundo de Tinieblas y n’especial a Vampiro La Mascarada 5ª Edición que nos trai Nosolorol. Un material que se dixebra un poco a les habituales caxes d’aniciu. Entamando porque nun ye una caxa y ya dempués nel conteníu. Un llibru de 88 páxines onde tienes lo suficiente pa entamar a xugar nesti sistema además qu’unes pincelaes fundamentales de ¿tresfondu? que creo son pernecesaries pa entender tolo que nos tien que dicir esti xuegu. Ye recomendáu pa xente de más de 18 años, polos temas que va tratar.

Creo que ye un mui bon puntu de partía pa xugar a Vampiro La Mascarada, coles regles básiques bien desplicaes y deprendiendoles a midía que vamos xugando la partía. Xugadores y narrador van dir de la mano nesti aprendizaxe. Amás l’aventura paezme bastante interesante pa xugala (tengo piensao prebalo colos collacios esti puente, ya vos contare) pa los dos “llaos”.

Tien una edición física mui curiá, con semeyes a color y con ambientación realista, como vien siendo habitual na llinia. Si que m’hubiese prestao que vinieren dados. Tol llibru te fae referencia a los dados propios del xuegu (que nun dexen ser de 10) y ponte una forma de traducilos. Ye bono p’ambientase pero pa daquién qu’entame nesti tipu de xuegos per equí. Uno, nun los tendrá, y dos pue perdese ente los símbolos al empecipiar a xugar. O bien traer los dados, o nun facer referencia a los dados oficiales, sedría la mio opinión. Por otru llau tien pequeños defeutos, soi un quisquillosu, como apuntar a páxines onde deberíen de tar coses y nun tan.

Quiciabes, 20€ que ye lo que me valió pudiera ser un poco caro en comparanza a otres caxes por material que traen y to eso. Pero la verdá ye que me presto lleelu. Asina qu’eso ye un tema suxetivo, si que ye verdá que nun trai nengún material aicional, ye solo’l llibru.

Y vamos colando ya. ¿Conocéis l’ambientación?¿Xugastis a dalguna edición de Vampiro La Mascarada? ¿Y a Sangre Nueva? ¿Que vos paeció? Dexámelo en comentarios, que me prestaría lleevos. Gracies por lleer!