Algo paecio al parte, pero pa los xuegos de mesa y rol. Vamos falar de les noticies de xuegos de mesa de la selmana 25 del 2023 (puedes atopar l’anterior equí)
Union Stockyards
Ficha:
- Xugadores: 2-5
- Duración: 45-90 min
- Edá: +14 años
- Editorial: Maldito Games
- Fecha: 22 de xunu
- Preciu: 55€.
- Ficha BGG
Union Stockyards ye un xuegu onde nos pondremos na peyeya d’una de les 5 grandes procesadores de carne. Llucha escontra los sindicatos y manipula’l mercáu pa maximizar los beneficios onde la ufierta y la demanda van variar los precios
Sea Stax
Ficha:
- Xugadores: 1
- Duración: infinito
- Edá: +7 años
- Editorial: Maldito Games
- Fecha: 22 de xunu
- Preciu: 15€.
Sea stax ye un xuegu de llóxica y puzzles pa un solo xugador nel que tendremos que colocar les criatures marines de tal forma qu’encaxen perfeutamente na cuadricula.
Dungeon Petz
Ficha:
- Xugadores: 2-4
- Duración: 90 min
- Edá: +12 años
- Editorial: Devir
- Fecha: Ya disponible
- Preciu: 60€.
- Ficha BGG
Vuelve a tar disponible en castellán tres d’un tiempu’l clásicu de Vlaada Chvatil. Monta’l to negociu de cria de mascotes monstruoses, los tiempos d’andar poles mazmorres ya finaron. Un xuegu que tengo entendío que ye esixente pero que se llevaba tiempu naguando pa que tornare.
Heroes Reunidos Volumen 2
Y pa finar, el día 23 sal a la venta el segundo pacjk d’Héroes Reunidos pa Marvel Champions. Nesti casi col pack vienen los héroes Ant-Man, La Avispa, Mercurio y la Bruja Escarlata al preciu de 45€ el pack.
Rol
Vamos coles novedaes de rol, y entamamos cola pantalla del Maestro del Saber pa El Anillo Único 2ª edición de Devir. Que dicir d’esti xuegu, mi xuegu de rol favoritu. Pues ya nos llega la pantalla cola información más esencial del Maestro del Saber pa la consulta na partía. Amás, vien consigo un suplementu col Compendio de Rivendel con mapas del valle, personaxes como Elrond y la posibilidá de xugar con Altos Elfos como raza. El Preciu de venta ye de 20€ y ya lu podéis mercar.
Siguimos coles novedaes de Walhalla Ediciones qu’espubliza el día 23 la Edición revisada de YSystem, un conxuntu de regles que podéis usar pa casi cualquier ambientación. Si nun m’equivoco, salio por Verkami fai pocu y ya lu tenéis disponible pa mercar. Amás, vien con 8 aventures ta feches pa poder esfrutar del xuegu lo más pronto posible.
Toca falar del primer suplementu de la llinia Obeliscos del recuerdo: Rituales Goblin un escenariu de campaña creáu por Carlinga Ediciones qu’utiliza les regles de la 5ª edición de Dungeons and Dragons. N’él tenéis una serie d’aventures no lienales nes que llevaréis a los pjs a nivel 10. El preciu de venta ye de 10 € y la salida pal día 23.
Y finamos el rol con Shadowlands Ediciones que tamién el día 23 trae un suplementu pa Kingsmouth Providence d’ El Viejo Terrible, una serie d’aventures que nos llevarán a la ciudá portuaria de Kingsport. El precio de venta ye de 10€
Que m’entra pol güeyu de las noticies/novedaes de xuegos de mesa / rol la selmana 25 de 2023
Vamos colo que me llama l’atención de les novedaes d’esta selmana 25 onde paez predominar el rol. Y ye de rol la novedá que más me presta. Nun ye otra que la pantalla del Maestro del Saber pa Anillo Único 2ª edición de Devir. De xuru nun vos garro de sorpresa, veiais-me venir jajaj
Y de xuegos de mesa, quedariame cola recopilación d’héroes de Marvel Champions de Fantasy Flight Games. Nun tengo nengún d’esi pack, pero tamién ye verdá que nun xuegu munchu a Marvel Champions nos caberos meses.
Finando les noticies de xuegos de mesa de la selmana 25 del 2023
Y na más pa les noticies de la selmana 25 del 2023, esto foi to lo más interesante que tope poles redes. De xuru hai munches más novedaes que se m’escapen, pero o nun tope información o nun tienen una fecha clara pa salir. Si me dexo alguna podéis dexámela en comentarios que gustosu l’añado al igual que si vos llama daqué l’atención.
Fontes pa la información i semeyes: