Güei, día d’Asturies, entama la campaña de mecenazgu de la Guerra de la Xoya, de Pablo M. Testa y Acuto Xuegos. Hubo dellos xuegos de mesa espublizaos n’asturianu pero esti pue dicise que ye’l primeru que podemos nomar “d’autor”. Asina que como nun podía ser d’otra manera contauté con Pablo pa face-y una entrevista pola campaña de la Guerra la Xoya.

Lo curioso ye que quedamos, y sin conocemos de na… Entamamos a falar. Lo que debiere ser una entrevista, foi un alderique de temas a bayura. Dende llueu del xuegu, d’onde vien pa onde va. Pero tamién del asturianu, la situación actual etc etc. Tanto foi, que nun puse ni’l movil  a grabar. Pasome, al menos a mi, el tiempo volando. Mui prestoso. Asina que voi intentar traslladavos de que va’l xuegu.

La Guerra de la Xoya

La Guerra de la Xoya ye un xuegu de cartes que va dende 2 a 6 xugadores nel que por mediu de les propies cartes vamos lluchar nuna guerra, la de la Xoya. Ca un vamos a tener dos cartes na mano y vamos poner delantre nuesu dos cartes boca abaxo y, encima, dos cartes bocarriba. El restu de cartes van pal mazu de robu. 

El funcionamientu ye cenciellu, paezme munchu a un xuegu que n’asturies denominamos como Culo ( ye tamiñen común a dellos sitios d’España, pero nun se como se noma). Tratase de dir xugando cartes teniendo que elevar (o igualar) la carta que l’anterior xuega (a nun ser que la carta marque otra cosa: pembaxo, por exemplu). Si echo un 3 el siguiente minimu un 3, pudiendo echar parexes (trios, etc)o una carta na mas. Y asina hasta que daquién nun lo pueda facer. Nesi casu robaría toles cartes xugaes. Pero, amás, les cartes tienen poderes. Por exemplu si sal un 6 la carta siguiente tien que ser menor. Pues xugar unes cartes que representen los espies, cartes coles que ties que “burlar” de los contrarios…

Pero, tamién entren en xuegu les cartes bocarriba y bocabaxo de ca xugador. Estes cartes na más que les pues xugar cuando’l mazu de robu se fine. Polo que pues llevar el control de les cartes que tien ca xugador hasta cierto puntu, ya qu’al menos un par d’elles por xugador nun se van saber. Esto desendolca nun xuegu mental de… Arriesgome y xuegu fuerte pensando si nun me van ganar? Xuego conservador pa llueu rematar? Dicir tamién que pue haber más de cuatro cartes por númberu (en partíes de 5 o 6 xugadores), polo que nun ye como una baraxa normal.

El xuegu ta piensáu pa ser xugáu por too tipu de públicos, dende los más espertos hasta los que nun tan tanto de xugar, y la so escalibilidá va aumentando’l mazu de xuegu. A más xugadores, más cartes

Como veis ye un xuegu cenciellu, pero con decisiones que pues tomar pa que la partía se te tuerza o non. Y como nun dura munchu pues xugar varies partíes siguíes. Constame que nel mecenazgu va vese un video esplicativu de como se xuega, pidovos perdón (a vosotros y l’autor) si nun vos consigo tresmitir bien el xuegu.

El xuegu tendrá un nivel d’aportación de 15 €, los primeros 5 mecenes y llueu 20€ más unvíu si nun ties a mano un puntu de recoxida

Va mas allá.

Pero y lo que más me presto de too lo que falamos ye que La Guerra la Xoya ye’l puntu d’entrada pa una cosa muncho más gorda que se ta cociendo. Un universu que se lleva preparando dende fai más de 10 años nel que se van completar con al menos otru xuegu, munchu más narrativu y pesáu y dos llibros que darán forma a tolo que Pablo lleva trabayando durante munchos años.

Ye más, la Guerra de la Xoya pudiere decise que ye un eventu más pequeño que pasa nel xuegu grande, adelantovos qu’esi xuegu va nomase Hestories de Seda y que l’autor espera espublizar después de la Guerra de la Xoya. Un universu por si mesmu.

Finando la entrevista de la campaña de La Guerra la Xoya

Y vamos finando esta especie “d’entrevista”. Animovos a echar una güeyá a la  campaña, equí vos dexo l’enllaz pa que miréis y llegaú’l casu, sofitéis. Yo siendovos sinceru, prestame abondu esti tipu d’iniciatives, y el mi sofitu tienenlu. Ver xuegos d’autor n’asturianu (tamién tará en castellán) yera una de les asignatures pendientes. Por suerte los xuegos de rol esa barrera ya la rompieron, yera hora que los xuegos de mesa lo fixeren. Amás, creo que ye un aciertu sacar un xuegu d’esti corte, pa que tenga muncha más difusión y llegue a más xente. Da-y les gracies a Pablo, pol tiempu que me dedicó y pol adelrique tan prestosu que tuvimos.