Sedrás quien a salvar a Han Solo del “Palacio de Jabba”  o cederás al poder de los Hutt movíu poles perres… Vamos ver si caltengo les sensaciones que tenía nes primeres impresiones d’esti xuegu de bolsillu. Opinión del Palacio de Jabba n’asturianu

Ficha:

• Xugadores: 2 – 6
• Duración: 20 minutos.
• Edad: 10+
• Editau por: Z-Man Games
• Autor: Justin Kemppainen
• Ficha na BGG

Conteníu:

• 29 cartes
• 13 fiches de Victoria
• 1 reglamentu
• 1 bolsa de tela

¿De qué va el “Palacio de Jabba”?

Tamos nos tiempos del Episodiu 6 de la famosa saga intergalactica. Han Solo ta reteníu pol señor del crime de Tattoine, Jabba l’Hutt. Los amigos del contrabandista quieren rescatalu, sedrán quien?

Con eses premises parte’l “Palacio de Jabba”, una reimplementación del xuegu Love Letter, pero cola temática de la famosa saga. Como nun xugué nunca al primeru, vamos evitar cualquier comparación y centranos solo nel xuegu en sí.

¿Como se xuega a “El Palacio de Jabba”?

Preparación de la partía

La preparación ye mui cenciella. Lo primero que vamos facer ye poner nel centru la mesa les fiches de victoria. Dempués vamos seleccionar un de los planes (si mal nun recuerdo vienen 4) poniendolu nel centro y dar una fueya de referencia a ca xugador.

Pa finar, embaraxamos el restu de cartes. Apartamos una, que queda fuera de la ronda, y damos una a ca xugador.

Ponemos el mazu restante al llau del plan escoyíu y llisto, podemos entamar a xugar!

Entamamos a xugar

Pa entamar a xugar, vamos dexar claro como se gana. Gana’l que primero lliegue al númberu de puntos de victoria. Estos puntos van en función del númberu de xugadores de la partía.

Conocío esto, empecipiamos. El xuegu va desarrollase por rondes hasta que se dean les condiciones de ganar. ¿Cuando fina una ronda? La ronda fina cuando se xuegue la cabera carta del mazu o nun quede más qu’un xugador.

La ronda xuegase mui fácil. Ca xugador en su turno roba una carta, y d’entre de les dos de la mano xuega una (siempre tien que tener una na mano) ¿Que carta xugar? Ehí ye onde entra la carta de plan. Ca plan tien unes condiciones pa ganar, xugaremos la carta que más nos convenga.

Vamos paranos un segundin p’analizar les cartes que se xueguen. Van tener dos palos, por ansí dicir, la rebelión (cartes de color roxu) y los Hutt (cartes de color verde). Amás, ca una va tener un númberu (el poder) y una habilidá. Con estes habilidaes, la fueya de referencia que pon les cartes qu’hai de ca tipu y el plan escoyíu, xugamos la que mas que nos convenga. Bien pa intentar ganar el plan o pa eliminar un xugador de la partía con una habilidá.

Y con esto taría to. Cuando la ronda fine, volvemos a preparar una nueva de la mesma forma que dixi enriba hasta que dalgún xugador o xugadora lliegue al oxetivu.

Opinión Personal

Vamos cola opinión personal d’esti “El Palacio de Jabba” un xuegu qu’entra nuna bolsuca y que podemos llevar a cualquier llau. Y eso ye un puntu a favor, ye perfeuto pa quedaes con amigos, parrilles, piscina… Ye sacalu y xugar, les regles ya veis que nun son na.

A destacar tamién ye l’arte y la producción. Les ilustraciones son perguapes y la bolsa y los contadores de victoria son mui afayadizos. Dende llueu presta de xugalu. Nun nos engañemos, el tema podía ser cualquier otru, pero agradeces que te lu ilustren d’esta manera.

Pa daquién pudiera ser un problema la eliminación de xugadores, pero, y siempre dende’l mi puntu de vista, les rondes son tan rápides qu’enseguida tas volviendo a xugar.

Tamién reafirmar lo que dixi nes primeres impresiones. El xuegu pese a que les regles permiten y nun hai problema de xugalu a 2 xugadores, pierdi muncho de la so esencia. El mazu nun s’acaba polo que nunca se toma’l plan pa ver quien gana. Tras xugalu a más xugadores, vese que cuando más brilla ye cuando la mesa ta llena.

Resumen Final

Pa finar, vamos col resumen del tostón d’enriba. Tenemos equí un xuegu que pues xugar con cualquiera y en cualquier llau, con un coste mui asequible, unos 12€, y con unes ilustraciones y presentación mui bones. Lo único ye que yo nun lu recomendaría xugar a menos de 4 xugadores.

El Palacio de Jabba va prestate si …

• Busques un xuegu pa sacalu a cualquiera y en cualquier llau
• Prestate la temática Star Wars, anque no tenga munchu pesu nel xuegu.
• Nun t’importen pequeños ratos muertos por eliminación de xugadores.

El Palacio de Jabba nun va prestate si …

• Vas xugar a dos xugadores.
• Busques algo mui temático.
• Nun te presta la eliminacion de xugadores.